Johanna vann kokkestipend på 50.000 kroner. Reiser til ein av verdas beste kokkar i Slovenia for å jobbe der og lære meir

Måndag kveld blei Matprisen delt ut, og under sendinga blei det klart at Johanna Magdeli Utvær Petterson frå Barmen stakk av med stipendet i KokkeKarlas legat. Johanna vil reise til ein av verdas beste kokkar, Ana Ros, i Slovenia og jobbe der for stipendet. 

Måndag kveld blei Matprisen delt ut, og under sendinga blei det klart at Johanna Magdeli Utvær Petterson frå Barmen stakk av med stipendet i KokkeKarlas legat.   Foto: Matprisen

Nyheter

Stipendet er på 50.000 kroner og blei delt ut under ei direktesending måndag.

Juryen seier om Johanna at ho er ei «ung kokke med ambisjonane på plass». Frå ho var lita har ho deltatt på garden på Barmøy med plukking av frukt og bær, men også sjarkfiske og kystkultur har fått prege oppveksten og matgleda, fortel dei.

Johanna sjølv blei veldig overraska då sjefan hennar på Bekkjarvik Gjestgiveri, Ørjan Johannessen, overrekte prisen.

– Oi, det hadde eg aldri trudd, seier Johanna, og det blei kjent at ho har tenkt å bruke stipendet på å bli ein endå betre kokk ved å reise til Slovenia og jobbe under Ana Ros.

– Det var kjempegøy å vinne dette stipendet, og eg gler meg til å reise til Slovenia for å bli inspirert og utvikle meg endå meir som kokk, sa Johanna.

– Det er så utruleg kjekt at Johanna vann dette stipendet, og så kult at ho reiser til Slovenia, seier ein av Johanna sine tidlegare lærarar ved Måløy vidaregåande skule, Bente Iren Vonheim, til Fjordenes Tidende.

Ho følgte utdelinga med spenning og er stolt over sin tidlegare elev.

Ordførar i Stad, Alfred Bjørlo, har også fått med seg sigeren, og skriv følgjande på Facebook:

– Gratulerer så mykje til Johanna Magdeli Pettersson Utvær frå Barmen i Stad kommune som i kveld har vunne Noregs viktigaste kokkestipend, KokkeKarlas Legat, på Matprisen 2020. Johanna er ein usedvanleg hardtarbeidande kokk, utdanna på kokkelinja ved Måløy vidaregåande skule med lærlingtid etterpå hos gullvinnarar i Bocuse d'Or på Bekkjarvik Gjestgiveri. No får ho stipend på 50.000 kroner som ho vil bruke til å gå i lære hos ein av verdas beste kokkar, Ana Ros, ved den to stjerners Michelin-restauranten Hiša Franko i Slovenia, for å lære meir om berekraftig mat og bruk av lokale råvarer. Vi er stolte av deg, Johanna!

Om stipendet:

Karla Linhave Siverts var ein av Norges framste kokkar. Med eit brennande hjarte for norske råvarer og norsk matkultur var ho ein høgt respektert kokk. Då ho som 29-åring døde av kreft Sankthansaften 2016 hadde ho allereie bestemt seg for å opprette eit legat: Stipend til unge kvinnelege kokkar, og økonomisk støtte til unge menneske som hamnar i ein vanskeleg økonomisk situasjon på grunn av alvorleg sjukdom, kan ein lese på legatet sine heimesider.