«Bygderampane» er klare for festivalen i havgapet: – Det blir eit forrykande show

Folkefavorittane Rotlaus er det tredje bandet som er klare for neste års strandfestival i Refvik utanfor Måløy. Og at det her er snakk om ein vinn-vinn-situasjon for alle partar er tydeleg. Bandet har nemleg sjølve hatt eit stort ønske om å spele på festivalen.

Kjem: Bandet Rotlaus frå Ørsta blei etablert i 2015. Bandet har mellom anna fått gull- og platinautmerkelse og vore nominert i klassa for årets album og årets gjennombrudd foran Spellemannprisen 2018.   Foto: Pressefoto

Nyheter

– Dei gler seg veldig. Dei har vore i kontakt med oss ved fleire anledningar, og har hatt lyst til å spele her. Så no er det veldig kjekt at vi endeleg kan få dei med og at dei får spele på den fantastiske festivalen vår, seier Rune Eriksen, styremedlem i festivalen.

Bandet skulle etter planen spele på festivalen i 2020, ein festival som av naturlege årsaker vart utsett. At bandet som har millionar av avspelingar på Spotify no endeleg er klare, gjer at forventningane om ei heidundrande oppleving, om mogleg, er enda større.

– Eg trur folk kan forvente seg eit forrykande show. Dei slepp i tillegg ny plate i desse tider, så eg trur det blir ein fantastisk konsert. Dei er veldig populære, lagar bra liv og har ein musikk som dei fleste likar.

Det skin gjennom at ørstingane også er ein favoritt blant festivalleiinga, utan at det er ein avgjerande faktor for valet.

– Eg likar dei veldig godt, og det trur eg resten av styret gjer også. Men det er aldri slik at vi vel ut eit band etter kva vi liker sjølv. Vi høyrer på kva publikum vil ha. Men det sjølvsagt kjekt at fleire deler musikksmaken som vi i styret har, smiler Eriksen.

Rotlaus blir omtalt som eit band som er som ein stor familie å rekne, som har fokus på å knytte band med publikum, og gi alt på scena. Dette har vokalist Bjørn Marius Øyehaug å seie om kontakten med publikum.

– Vi har det alltid kjekt saman som band. Og har ein det ikkje kjekt sjølve, kan ein ikkje vente at publikum har det heller.

Bandet står på scena fredag kveld under festivalen. Frå før har festivalleiinga slept duoen Madcon og artisten Ruben.

Det står att framleis nokre namn, så det er berre å følge med på Fjordenes Tidende i vekene framover for fleire spennande musikknyheiter frå Refvik.