Vest politidistrikt har god påskeberedskap trass i det omfattande flyktningoppdraget. Men dei vedgår at dei ikkje var forberedt på omfanget av det oppdraget.
Tre og ei halv veke etter at Vest politidistrikt starta arbeidet med å registrere ukrainske flyktningar lokalt, har dei no god kontroll.
– Vi var ikkje budd på eit slikt oppdrag og måtte snu oss om raskt. Heldigvis er uforutsette hendingar noko vi i politiet er gode på. På rekordtid har vi fått på plass og bemanna registreringssenteret på Kokstad og i Førde og vi har no god kontroll, seier politimeister Kaare Songstad i ei pressemelding.
70 av 175 flyktningar skal bu i Måløy
– Ta kontakt
I starten ba politiet flyktningar som kunne vente om å utsetje oppmøte. No ønskjer politiet at dei som har venta tek kontakt for å få tildelt tid for registrering.
– Den første veka hadde vi nærare 500 som venta på registrering og fleire har komen til etter det. Vi har bygd opp kapasiteten og reknar med å vera ajour før påske. Så no ber vi alle ukrainske flyktningar i politidistriktet som ikkje har vore i kontakt med oss om å ta kontakt, seier politimeisteren.
Informasjon om kor dei skal ta kontakt ligg tilgjengeleg på politiet.no.
Elena og familien flykta i full fart med berre éin koffert: – Det betyr mykje å bli møtt slik vi har blitt møtt
God beredskap på kostnad av dagleg drift
Rundt 80 polititilsette frå heile politidistriktet er omdisponert til arbeidet med flyktningregistrering.
– Samstundes har det vore viktig for oss at oppdraget ikkje skulle gå ut over beredskapen i politidistriktet og det er mange som har stått på ekstra den siste tiden for å få hjula til å gå rundt. Innbyggjarane kan vere trygge på at vi har god beredskap også gjennom påska, seier Songstad.
Men innsatsen og flyttinga av folk går ut over andre oppgåver.
– Dette vil merkast på andre måtar og er sjølvsagt uheldig for dei som blir råka. Vi har fått ekstra midlar og jobbar no med å tilsette fleire for å hjelpe oss gjennom situasjonen. Det vil ta noko tid før dei midlertidige ressursane er på plass, men vi trur alle har forståing for at dette arbeidet er viktig å prioritere, seier politimeisteren.
Fekk overveldande respons då dei spurde etter klede til flyktningar: – Eg blir heilt rørt
Styrkt territorialkontroll
Politiet har fått i oppdrag å intensivere territorialkontrollen for å førebygge, kjempe mot og avdekke ulike formar for kriminalitet og truslar som følge av tryggleikssituasjonen i Europa generelt, og den auka migrasjonen til Norge spesielt.
– Dette betyr ikkje at vi tek opp at grensekontrollen for alle som kjem inn via våre grenser, slik vi hadde under pandemien, men vi skjerpar kontrollen med utlendingar som er i Norge, enten på grensa eller andre stader i politidistriktet, seier Songstad.
70 tilsette i Vest politidistrikt henta til å jobbe med flyktningar
Vest politidistrikt har førebels ikkje registrert hendingar der ukrainske flyktningar er utsett for integritetskrenkande kriminalitet.
– Vi har jamvel stor fokus på dette og politiet følger med på og jobbar førebyggande for å motverke at dei mellom anna blir utnytta som ulovleg arbeidskraft.