Andrea valde også studiespesialiserande fordi det då var lettare å ta eit utvekslingsår i Frankrike etter første året.

Vil bli politi

– Det opnar mange vegar vidare i livet og du treng ikkje låse deg til eitt yrke. Sidan eg skal bli politi er dette den utdanninga eg treng, seier Hedda.

– Eg var litt usikker og då var studiespesialiserande veldig trygt å velje. Då kan eg bygge på den utdanninga uansett kva eg gjer etterpå, seier Adrian.

Kristoffer er einig:

– Eg har tre brør som har gått same retninga og dei treivst veldig godt. Det er greitt å sjå kva dei har kunne gjort etterpå også, seier Kristoffer.

– Slik som dette står vi kvar dag, smiler Andrea. Foto: Kjellrun Åsebø

– Programfaga er kjekke

– Det opnar utan tvil mange dører og mogelegheiter. Elevane vil ha ein del teori, men lærarane er kjempeflinke til å variere og tenke på kva som er best for elevane, seier avdelingsleiar for studiespesialiserande, Kari Sølvberg.

Avdelingsleiaren forklarer at elevane opplever ein forskjell frå ungdomsskulen fordi ein på studiespesialiserande kan velje programfag utifrå kva ein liker og kva ein trur ein vil jobbe med seinare i livet. Elevane er einige i dette:

– Det kjekkaste er programfaga og å velje dei faga vi synest er gøy. Eg har valt økonomi, marknadsføring og engelsk, seier Hedda.

Det er ikkje nokon spøk å arrangere Framflyt. Her under årets Framflyt medan konferansegjestane er på veg inn for å finne plassane sine i salen. Foto: Kjellrun Åsebø

Ho har sett korleis ungdomsbedrifter jobbar med ungdomskonferansen Framflyt og neste skuleår skal ho vere med å arrangere den.

– Eg gler meg! Det verkar både kjekt, spennande og utfordrande å arbeide med ulike oppgåver knytt til konferansen.

– Eg liker også marknadsføring fordi det er noko heilt anna enn det vi har gjort tidlegare. Det er eit fag ein uansett får bruk for, seier Kristoffer.

– Eg tenker for tida berre på språkreisa til Frankrike som vi snart skal reise på, ler Andrea.

Marknadsføringselevane på vg2 gler seg til dei kan arrangere Framflyt. Her er Elisabeth Gjengedal, Tuva Rundereim frå Flatraket og Sandra Rundereim frå Selje i arbeid under Framflyt 2023. Foto: Kjellrun Åsebø

Har det kjekt på skulen

Elevane skryt av både lærarane og klassemiljøet:

– Sjølv om det er mykje teori på studiespesialiserande, sit vi ikkje berre og les i bøker. Dei fleste lærarane er veldig flinke til å variere. Første året hadde vi eigentleg dei beste lærarane vi kunne ha bedt om og dette skuleåret var lærarane også klare til å ta imot oss og gjere det godt for oss, seier Adrian.

– Det er også veldig godt klassemiljø. Fleire av oss kjenner kvarandre frå før, seier Hedda og Andrea.

– Vi kan ikkje sjå at nokon går åleine. Vi er éi klasse og alle kan snakke med alle. Og alle har sine vennar og sin vesle gjeng, seier Kristoffer.

Frå venstre Elise Silden, konferansier Elise Silden, Henriette Wik og Marine Otneim etter at Framflyt 2023 var over. Foto: Gjert Myrestrand