– Vi ønsker at Anne Kristoffersen skal få ei julestjerne for den innsatsen ho har gjort for bygda, naboskap, grendelag, kyrkja og soknerådet i mange år. Ho stiller opp i bygda og nabolaget på mange måtar og er alltid hjelpsam og hyggeleg, seier Jorunn og Reidar Ytre-Hauge til Fjordenes Tidende.
Det er ein overraska grendelagsleiar i Berle som svarar etter at Fjordenes Tidende fortel at ho er ei av dei som får julestjerne av avisa i adventstida.
– Nei gurimalla kor kjekt då! Eg blir litt rørt eg no. Jorunn og Reidar skulle no hatt ei julestjerne sjølve, seier Anne Kristoffersen.
– Eg veit no ikkje om det er heilt fortent. Det er så mange som stiller opp for å gjere Berle til ei god bygd å bu i, held ho fram.
– Ja, du meiner at samhaldet og naboskapet i bygda er godt?
– Ja, det er det verkeleg. Det er aldri problem viss ein treng hjelp med noko, treng å låne noko eller kva det skulle vere. Det er berre å spørje naboen.
– Det er vel mange naboar som spør deg og om hjelp også?
– Ja, det er no det, men det er klart at ein stiller opp når ein kan. Eg lurer forresten på om det er sommarselskapa for nabolaget eg har invitert til på altanen min som Jorunn og Reidar tenker på når dei har nominert meg, ler Kristoffersen.
– Ein må prøve å hjelpe til der det trengst
Anne Kristoffersen meiner det handlar om å prøve å hjelpe til der det trengst, enten det er grendehuset eller kyrkja.
– Dette er hus vi alle har bruk for her i bygda på kvar sin måte og til kvar si tid.
Ho synest det er mange som fortener ei julestjerne i desse dagar, men ønsker å takke for den hyggelege merksemda.
– Eg må berre få takke Jorunn og Reidar. Det er kjekt å bli sett pris på, sjølv om det er mange som skulle fått ei julestjerne. Om ein time skal eg forresten inn i kyrkja og jobbe litt saman med begge to, seier Kristoffersen med eit smil.