– Før har det vore 18 års aldersgrense, men det går vi vekk ifrå i år. Det er viktig for ungdom under 18 år å vite kva som skjer i regionen vår, spesielt dei som vel yrkesfag, seier prosjektleiar Karoline Myhre Føleide i Nordfjord vekst.

Ho visar til at mange av bedriftene i regionen treng nettopp fagfolk og lærlingar, og håpar derfor at fleire finn vegen til Operahuset tysdag 11. april.Programmet for det ellevte Påsketreffet er spikra, og komiteen legg vekt på å vise fram noko av det regionen har å by på.

– I år kjem Sagastad til å vere ope for folk, så ein kan kome og sjå på Myklebustskipet og ta ein tur i Sagaløypa. Dette er nytt i år og vil skje før sjølve treffet, fortel prosjektleiaren.

Deretter blir det tradisjonelt treff med stands, ledige stillingar og matservering. Randi Paulsen Humborstad vil presentere Stad skipstunnel.

– Tunnelen er veldig aktuell når den no kom med i NTP. I tillegg kjem ho til å trekke inn fleire reiselivsprosjekt. Det blir fokus på reiseliv, og det nye og spanande som skjer i regionen, seier Myhre Føleide.

I fjor var det deltakarrekord på treffet med 40 bedrifter og 400 deltakarar.

– Vi håpar jo å følgje opp suksessen, seier ho, og fortel at det sist veke var kome 35 påmelde bedrifter.

– Vi håpar folk frå heile regionen kjem. Dette er Nordfjord sin største rekrutteringsfest, seier prosjektleiaren, som håpar at mange nyttar sjansen til å få med seg kva som skjer.

– Det er ein fin arena for dei som bur her til å halde seg oppdatert, det er ikkje berre for dei som skal flytte heim.

Etter treffet slepp Malakoff Rockfestival delar av programmet sitt i Gymmen, med konsert med Pil og Bue. Kvelden blir avslutta med etterfest på Expeditionen.

– Dette blir ein kanondag på Nordfjordeid, meld dykk på, oppmodar Myhre Føleide.