Snart får desse elevane to nye skulekameratar. Ein tilflyttande familie med to barn reddar Kolset oppvekst frå å bli udelt skule frå hausten.

Med dei nye elevane kjem skulen akkurat opp på den magiske sperregrensa på 13 elevar – talet som trengst for å halde oppe skulen som han er.

– Der var i utgangspunktet 11, men no få vi to nye. Ein som skal begynne i andre klasse no til hausten. Og ein som skal gå siste året i barnehagen, og begynne på skulen året etter, seier kommunalsjef Gro Bakke Abildsnes, som synest dette er ei skikkeleg gladnyheit for bygda og alle.

– Vi er kjempeglade. Vi ønskjer jo å behalde Kolset skule. Vi håpar det kjem endå fleire så ein slepp å ligge på vippen, seier ho.

Orienterte på bygdemøte

Førre veke hadde dei eit bygdemøte for å fortelje gladnyheita og for å informere om status for forstudien om Kolset oppvekst.

– No blir det forhåpentlegvis skule her litt til, seier FAU-leiar Asle Skaar, som fortel at både Kolset Krins Utviklingslag og bygda er glad for denne nyheita. – Det ser no ut som det ikkje går mot udelt skule. Men vi ligg jo og vippar så det kan gå begge vegar. Det er absolutt sårbart. Men det kan bety at vi får nokre år på oss for å jobbe for auke i elevtalet. Det er veldig positivt.

Kom som ei overrasking

Ei breitt samansett styringsgruppe jobbar for tida med ein forstudie på mulege alternativ for Kolset oppvekst i lys av framskrivingstala som signaliserer for få elevar. No er rapporten nesten ferdig. Og dei to nye elevane kom som ei overrasking.

– Vi hadde jo nesten ferdigstilt rapporten då vi fekk vite om denne familien berre ei veke før bygdemøtet, seier Bakke Abildsnes, som seier at dei likevel gjer ferdig rapporten.

– Vi har fått eit mandat av formannskapet, og eg tenkjer også at det er greitt å ha gjort dette arbeidet. 13 elevar er heilt i grenseland. Forsvinn det ein elev, er vi under sperregrensa. Håpet er at det skal kome fleire elevar, men det ville vere dumt å måtte begynne prosessen heilt på nytt om vi hamnar tilbake på udelt.

Når rapporten er ferdig, truleg i slutten av denne veka, går den vidare ut på høyring og til behandling i formannskapet.

– Politikarane står då fritt til å velje korleis dei vil ta denne saka vidare, om dei vil seie noko om retninga no eller la det vente, seier kommunalsjefen.