Anna Leknesund håper at ingen andre får oppleve det ho var gjennom då ho vart alvorleg sjuk og måtte reise med ambulanse til Førde sentralsjukehus. Ho vil ha legevakt i heimkommunen.

– Eg håper at eg aldri får oppleve noko slikt igjen, og at heller ingen andre gjer det, seier Anna Leknesund i Kalvåg, etter ei vanskeleg oppleving då ho vart akutt sjuk ei natt i mars.

77-åringen meiner at om legevakta hadde vore i Bremanger kommune, ville ein lege ha skjønt at ho hadde hol på tjukktarmen, og send ho med helikopter til sjukehus.Men legevakta var i Florø, og AMK sette opp ambulanse for sjuketransport i bil frå Kalvåg.

Anna Leknesund seier at reisa i ambulansen nesten ikke var til å halde ut.

– Det tar 2,5 timar å køyre til Førde, og vegen er dårleg og humpete. Eg var sjuk med forferdelege smerter og kasta opp heile vegen. Eg kunne ha mista livet på heile greia, seier ho.

Det var først då ho var framme ved sjukehuset at ho fekk medisin for smertene. Det vart gjort hasteoperasjon, og Leknesund fortel at ho var ei veke på intensiven, to av døgna meir eller mindre i livsfare. Etter tre veker kom ho heim.

Reiste i sju timar

– Ei slik hending går inn på ein psykisk etterpå, når ein tenker på det, seier Anna Leknesund.

Men alt eitpar veker seinare vart ho igjen akutt sjuk, då ho fekk sterke naseblødningar. Det var ein lege i Florø som hadde vakt, og det vart rekvirert ambulanse.

– Denne gongen forlangte eg å få båre. Dei kom med sjukestol og bar meg opp til båra ved sjukebilen, seier Anna Leknesund, som ikkje kan skjøne at ho sjølv måtte gå til båra første gong ho var sjuk.

Reisetida til legen var om lag to timar, og etter sju timar var Leknesund komen på sjukehus.

– Eg fekk to posar med blod og vart liggande frå torsdag til måndag, fortel Leknesund, som seier at sjukehusbehandlinga var god.

Ho beklagar at det tok så lang tid å få hjelp i ein akutt situasjon.

– Eg meiner at det må vere fastlegar på vakt i ytre Bremanger eller i Svelgen. Eg trur at fastlegen min, Solaty, ville ha sendt meg med helikopter begge gongane. I staden fekk eg desse fæle opplevingane, seier 77-åringen.