Det er NRK Vestland som melder saka tysdag kveld.

Haugsdal viser til at passasjergrunnlaget er for lågt til å få lønsam drift, og at årlege driftskostnader vil kome på mellom 55 og 70 millionar kroner.

Ifølge NRK rår fylkesdirektøren til at det blir jobba for at staten også kan bidra i prosjektet.

Slik er forslaget til innstilling i sakspapira til møtet i hovudutval for samferdsle 17. januar:

«1. Vestland fylkeskommune legg til grunn at etablering av eit fylkeskryssande båttilbod mellom Bergen og Ålesund må ha statleg medverknad, slik til dømes tog og Kystruta har.

2. Fylkestinget i Vestland vedtek at det skal arbeidast vidare med prosjektet med sikte på auka statleg medfinansiering og optimalisering av rutetilbodet, knytt til opninga av Stad skipstunnel. Utsleppsfri teknologi vil då vere tilgjengeleg og er ein føresetnad for prosjektet. Eit fylkeskryssande hurtigbåtsamband vil i tillegg til transport av passasjerar også vere eit godt supplement for transport av gods på delstrekningar. Stad skipstunnel vil bli eit reisemål, og med forventa auke i turisttrafikk på ei slik båtrute. Utvikling av fossilfrie hurtigbåtsamband er viktig både for å nå klimamåla, for norsk industri og for å binde saman næringsliv og lokalsamfunn langs kysten.

3. Fylkestinget ber om undervegsrapportering i juni 2023.»

Fylkespolitikarane i Møre og Romsdal har vedtatt innstillinga som no blir lagt fram for samferdslepolitikarane i Vestland.