Petter og Lena bur i øvre Okshola i Deknepollen der dei har ein låve eller ei lade i nærleiken av huset sitt. Kva jul set dei ut ein julenisse utanfor låven. Når ungane i barnehagen går på tur forbi låven, vinkar dei til denne nissen.

– Høgdepunktet vårt i desember

– Og så kjem dagen der dei blir invitert inn på låven til denne nissen. Petter og Lena gjer klar låven slik at vi får låne den. Ein av dei tilsette kler seg ut som nisse og vi prøver å skape ein spennande juledag for barna, seier Anette Sætren Halsør, tilsett i Skavøypoll barnehage, og legg til:

– På denne måten sørger dei kvart år for høgdepunktet i desember for barna i barnehagen.

Dei tilsette i barnehagen synest det er fantastisk at ekteparet fortset å låne ut låven og legge til rette for nissefesten år etter år trass i at dei ikkje lenger har barn i barnehagen.

– Det er stor stas og vi føler oss veldig heldige som har dei, seier Anette.

Smånissar på spennande tur

Ungane kjem utkledd som smånissar til barnehagen på dagen nissefesten er.

– Dei gler seg veldig til endeleg å få snakke og møte nissen som vi har gått forbi fleire gongar. Dei ulike avdelingane går opp i puljer gjennom dagen og det er knytt så mange forventingar til denne nissefesten på låven. Dei eldste avdelingane et nissegraut saman med nissen. Vi syng til nissen og barna får sitte på fanget til nissen, så det blir ei god oppleving saman med han, forklarer ho.

For dei vaksne er dette også blitt ein tradisjon.

– Det blir ikkje jul for oss heller utan eit besøk på låven i Okshola, ler Anette.

Lena og Petter er glade for å høyre at tradisjonen betyr mykje for barna og dei tilsette i barnehagen.

Over 25 år med nissebesøk

– Å, det var skikkeleg koseleg. Men vi kan ikkje ta æra for tradisjonen, seier Lena.

Det var foreldra til Petter, Marit og John Oksholen, som starta med tradisjonen for mange år sidan.

– Tradisjonen starta lenge før vi flytta hit. Så vi har eigentleg berre halde den ved like, smiler Lena og undersøker kjapt med svigermora kor lenge den koselege tradisjonen har vore.

– John og Marit pynta ladetrappa med nisse i mange år først. Når barnehagen var på tur oppe i Okshola for å ake var det veldig spennande å få helse på nissen. Litt skrekkblanda fryd, for den første nissemaska var litt skummel. For rundt 25 år sidan spurde barnehagen om dei kunne få spise julegrauten i lada, og det sa John ja til med ein gong, og sidan har det vore ein tradisjon, forklarer Lena.

Kastar ut rotet

Før barnehagen kjem ryddar Lena og Petter ut det som står i låven.

– Vi må rydde lada før dei kjem fordi der lagrer vi ein del ting. Har ein mykje plass, har ein mykje rot. Så der har vi blant anna hagemøblar. Og så kan det ha vore ein fest som ikkje er heilt rydda opp etter, ler ho.

Etter å ha rydda og laga plass, set Lena og Petter opp eit langbord.

– Resten gjer barnehagen, smiler ho.

Torsdag var barnehagen på besøk i låven. Langt der oppe sit nissen som dei endeleg skal få tilbringe dagen saman med.

– Det er så mange forventningar og det er så kjekt for oss vaksne også, seier Anette og fortel at dei bruker å legge igjen ei takke-helsing i låven til nissen og Lena og Petter.

– Tusen takk for at vi får låne låve. Vi set så stor pris på det, seier dei tilsette i Skavøypoll barnehage.

På veg opp til nissen. Foto: Skavøypoll barnehage
– Kan vi få komme inn? Foto: Skavøypoll barnehage
Barna får sitte på fanget til nissen og ete graut saman med han. Foto: Skavøypoll barnehage
– Det er ei spennande og god oppleving for barna, seier Anette Sætren Halsør i Skavøypoll barnehage. Foto: Skavøypoll barnehage