Eidarussen meiner russen i Nordfjord har ei kjekk russetid og få problem med vald.

– Eg trur at folk passar betre på kvarandre. Det er generell fokus på vald og valdtekter, men eigentleg er det veldig lite vald mot russ i år. Eidarussen har ikkje hatt problem, seier Asbjørn Hagen, og han trur at det same gjeld for andre russ i Nordfjord.

Russen står framfor to netter med feiring, og i kveld tar det laust med fylkestreff på Breim. I morgon skal eidarussen samlast i Malakoff slik tradisjonen er.

– I Malakoff blir vi berre raudruss frå Eid. Det skal bli kos, og vi er heime, seier Aina Sofie Bakke frå Hjelmelandsdalen.

Eidarussen har reist til Måløy, Stryn og Ørsta, og sist helg var det landstreffet på Lillehammer som stod på programmet. Aina Sofie Bakke seier at det gjekk greitt også på Lillehammer.

– Eg følte meg kjempetrygg. Det var vakter over alt, og det var ikkje registrert valdtekter, seier ho.

Ho trur at om noko skulle ha skjedd, måtte det ha vore når nokon gjekk åleine heim. Inne på området var det veldig godt opplyst over alt.Russepresident Simen Andreas Nord veit at nokre tok med pepparspray til landstreffet.

– Men eg trur at dei gløymde at dei hadde det med seg.

Det totale inntrykket er likevel at folk passar betre på seg sjølve, fordi det har vore noko kvart år.

Også på eidarussen sitt store arrangement med 700 gjester i Malakoff natt til 1. mai gjekk alt veldig bra.

– Det var ikkje noko tull der, og politiet var fornøgde, seier russepresidenten, som legg til at eidarussen er stolt over arrangementet, og at dei er glade for at veldig mange foreldre stilte opp som vakter.

Denne gongen satsa eidarussen stort med eit budsjett på 120.000 kroner, og greidde å kome ut på plussida.

I dag skal russen i Nordfjord igjen ut for å ha det gøy.

– Alle gler seg veldig til Breim, og der blir det nesten berre kjentfolk. Dei får skryt kvart år, seier Nord, som meiner at det er fint at at det er laga eit program med simulering av bilkollisjonar, og at det kan vere noko å lære.