Det er snakk om ein open båt som dreiv ute på Nordfjorden utan nokon ombord.
– Politiet vart varsla av ein los på eit cruiseskip som hadde observert båten. I tillegg fekk vi inn fleire meldingar frå land. Hovudredningssentralen vart då varsla, og det vart sendt ut ein båt med mannskap frå Røde Kors Hjelpekorps, opplyser operasjonsleiar Jørgen Ommedal ved Vest politidistrikt til Fjordenes Tidende.
Etter undersøkingar på staden er det ikkje mistanke om at nokon har falle overbord frå båten. Aksjonen er no avslutta, og båten er slept inn til småbåtkaia på Haus i Stad kommune.
– Om nokon kjenner til båten, ber vi dei kontakte politiet. Båten er no å rekne som hittegods, seier Ommedal.
