Kyrkjekontoret i Kinn kommune prøvde i starten av desember å finne ut kven det er sin ring.
– Det begynte med at eg fekk ein førespurnad frå resepsjonen om å hjelpe til å finne eigaren av ein giftering som har lege i skuffa deira i eit par år, seier Evy Haug Nybakk ved kyrkjekontoret.
Den spesielle datoen
Haug Nybakk har søkt i registera til kommunen, men har ikkje funne nokon som gifta seg på denne datoen i dette året.
– Eg fann ingen med dette namnet som har gifta seg verken i nord eller i sør i kommunen med dette namnet på denne datoen dette året, seier ho.
Ho har også sjekka kva vekedag denne datoen fall på i 1944. Det var ein torsdag.
– Det er ikkje så vanleg med vigslar på torsdagar utan at det er heilt spesielle grunnar, forklarer ho.
I ringen er det gravert inn 24.08.44.
– Kan det vere nokon som har ein merkedag denne dagen? Eg blei litt opphengt i denne ringen og ønskte å prøve å finne eigaren og la derfor ut ei etterlysing på Facebook-sidene til Kyrkjene i Vågsøy, forklarer ho.
Kven leverte inn ringen?
Men det er framleis ingen spor i saka.
– Det er ingen som har tatt kontakt. Ringen er framleis eit mysterium, seier Haug Nybakk.
Lisbeth Furenes Blålid, konsulent i Kinn kommune, hugsar at ho var på jobb dagen ringen blei levert inn for litt over to år sidan, men verken ho eller kollegaen som tok i mot ringen hugsar kven som leverte den inn.
– Eg har ringen her. Det er i alle fall to år sidan den blei levert inn, seier Furenes Blålid.
Kor blei ringen funne?
Ingen av dei Fjordenes Tidende har snakka med veit kor ringen blei funne.
– Eg trur den blei funnen ein plass i Måløy, men eg hugsar ikkje om personen som leverte den inn sa akkurat kor den blei funnen, seier Furenes Blålid.
Innlegget til Kyrkjene i Kinn blei også delt på Facebook-sida «Du vet du er frå Måløy». Der kom det inn tips på namn på personar som kunne vore aktuelle med tanke på namnet Karl og årstalet. Men desse er sjekka ut og ingen av desse manglar ringane sine.
– Eg trur meir no på at det er ein forlovingsring på grunn av vekedagen. Men vi har også sjekka etter namnet Karl rundt to år etter datoen som er inngravert, som ofte var perioden ein var forlova, men finn ikkje nokon som har gifta seg som heiter Karl då heller, seier Haug Nybakk ved Kinn kyrkjekontor.
Er den eigentleg så gamal som den ser ut?
Fjordenes Tidende tok ringen med til ekspertar, gullsmeden BergArt på Nordfjordeid, for å få den vurdert. Er det gull? Er den så gamal som inskripsjonen seier? Er det ein forlovingsring eller giftering?
– No blei eg også veldig nysgjerrig. Det hadde vore veldig kjekt å finne eigaren av ringen eller kanskje barna hennar, seier Ingrid Oselie Naustdal på BergArt.
Prosten på sporet?
Fjordenes Tidende tok også kontakt med prost i Nordfjord, Mari Saltkjel, for å høyre om ho kan spørje sine kontaktar i kommunane i området for å sjekke om det er nokon av desse som veit noko. I 1944 var det jo ikkje dei same kommunegrensene som no, så ringen kan vere frå heile Nordjord, Vestlandet eller heile landet.
– Eg har sendt spørsmål til kyrkjeverjene i Kinn, Stad, Gloppen og Bremanger, men utan resultat, seier Saltkjel.
Så no håpar vi de der ute kan hjelpe oss vidare? Kven er Karl, namnet som er inngravert i ringen? Og kven er kvinna Karl var forlova eller gift med, eigaren av ringen?