– Eg valde informasjonsteknologi og medieproduksjon fordi eg er mest interessert i data og programmering, og fordi nokre lærarar har sagt til meg at eg er flink i programmering, smiler Aydan Molenaar og legg til:
– Eg har ikkje angra på valet.
Aydan er usikker på kva han kjem til å jobbe som seinare, men han er ganske sikker på at data kjem til å vere ein stor del av arbeidsdagen.
Styrer mykje av tida sjølve
– Eg har lyst på ein jobb der eg kan jobbe heimanfrå og styre mi eiga tid. Derfor er dette utdanningsprogrammet eit godt val for meg, seier Noodee Phongsai.
Ho liker godt måten arbeidet dei skal gjere blir lagt opp på.
– Det er så fritt og ein får gjere det ein vil og som ein synest er interessant. Vi finn blant anna eigne prosjekt som vi får tilbakemelding på, seier Noodee.
Tumas Slizys er einig:
– Prosjekta kan vere innan programmering, redigering, lage film, plakatar eller ta bilde til kampanjar. Det er ganske kjekt.
Vitalii Harnaha kom til Noreg frå Ukraina for berre eitt og eit halvt år sidan og liker seg godt på skulen.
– Det er mykje som er kjekt. Eg er glad i å jobbe med Photoshop og redigering, og så synest eg det er interessant å lære nye språk. No har vi begynt å lære JavaScript, seier han.
Nokre av elevane jobbar med å lage spel og om nokre veker skal dei lage appar.
– Det er ganske tungt å lage spel fordi det tar lang tid å programmere, seier Tumas.
Trivst på hybel og på skulen
Han og Aydan kjem frå Bremanger kommune, medan Noodee kjem frå Stryn. Alle tre bur på hybel, medan Harnaha bur i Måløy.
– Det er ganske kjekt å bu på hybel her. Men vi bur i Blålid så av og til er det litt langt å gå til skulen, smiler Aydan.
– Og så er vi av og til på open skule og et middag, seier dei.
Elevane skryt av klassemiljøet og føler dei er blitt godt kjende sjølv om dei kjem frå ulike plassar.
Vitalii snakkar framleis engelsk med klassevennane, men har lært ein del norsk. Og timane er på norsk.
– Då lærer eg også meir norsk. Men det er vanskeleg å forstå av og til, men viss det er noko eg ikkje forstår spør eg lærarane og dei forklarer meg det alltid. Klassemiljøet er også bra, eg har ikkje sett nokon vere stygge med andre, seier han.