Opplagstala for andre halvår 2021 for Fjordenes Tidende viser ei solid auke på 164, samanlikna med første halvår.

– Det er veldig kjekt å sjå opplagsveksten for lokalavisa vår, og at lesarane våre likar produktet vi leverer. Spesielt er eg fornøgd med den digitale veksten. Dette har vore eit satsingsområde for oss i lang tid. Vi prøver stadig å utvikle oss digitalt, og det er kjekt å sjå at satsinga ber frukter, seier ansvarleg redaktør og dagleg leiar Håvar Fagerli i Fjordenes Tidende.

Frå andre halvår 2020 til andre halvår 2021 aukar Fjordenes Tidende sine digitale opplagstal med 381 abonnentar.

– Vi satsar på fleire område her, og driv både med video, podkast og streaming. Og alt dette gler vi oss til å halde fram med å utvikle oss vidare på, seier Fagerli.

Fjordenes Tidende aukar også opplaget på komplettbrukarane, dei vil seie dei som både har papiravis, e-avis og abonnement på fjt.no. Og ingen treng å vere redde for at papiravisa skal forsvinne med det første. Den er framleis ein viktig og sentral del av mediehuset.

– Vi veit at mange av våre lesarar framleis trivst godt med ei avis dei kan halde i hendene og bla i. Vi skal sjølvsagt halde fram med å gje ut ei god papiravis om alt det spennande som skjer i regionen vår, seier Fagerli.

Dei gode opplagstala for Fjordenes Tidende kjem samtidig som redaksjonen har gått over til eit nytt publiseringssystem som forhåpentlegvis vil gje lesarane ei enda betre oppleving på fjt.no.

– Det nye publiseringsverktøyet gir oss fleire moglegheiter til å vere kreative, og vi håpar lesarane også ser det og set pris på det, seier Fagerli.