Opplagstala for første halvår 2022 for Fjordenes Tidende viser ei solid opplagsauke samanlikna med same periode i fjor. Fjordenes Tidende veks med 175 i opplag.
– Det er svært gledeleg at Fjordenes Tidende har ei auke i opplagstal, og ekstra kjekt å sjå at vi er dei som aukar mest i vårt område. Dette er takka vere dyktige medarbeidarar som står på kvar dag for å lage eit produkt som vert sett pris på, seier ansvarleg redaktør og dagleg leiar Håvar Fagerli i Fjordenes Tidende.
Digital vekst
Frå første halvår 2021 til første halvår 2022 auka Fjordenes Tidende sine digitale opplagstal med 435 abonnentar.
– Fjordenes Tidende satsar digitalt, og det er kjekt å sjå at vi har så stor auke på det digitale produktet vårt. Dette motiverer oss til jobbe vidare med å bli endå betre. Vi gler oss til å halde fram med å utvikle oss, seier Fagerli, og held fram:
– Eg vil rette ein stor takk til alle kundar, annonsørar og lesarar av lokalavisa.
| Avis | Første halvår 2022 | Første halvår 2021 | Endring i opplag |
|---|---|---|---|
| Firdaposten | 4 904 | 5 026 | -122 |
| Fjordenes Tidende | 4 598 | 4 423 | 175 |
| Fjordingen | 3 861 | 3 786 | 75 |
| Fjordabladet | 3 161 | 3 066 | 95 |
| Firda Tidend | 2 927 | 2 893 | 34 |
Papir framleis viktig
Opplagstala viser ein nedgang på 249 på komplettbrukarane, dei vil seie dei som både har papiravis, e-avis og abonnement på fjt.no.
– Det er ein liten nedgang på papir- og komplett-abonnement. Men sjølv om vi satsar digitalt, vil vi også halde fram med å levere eit godt produkt på papir. Vi veit at mange er glade i papiravisa, seier Fagerli.
