– Eg vart veldig lei meg då eg høyrde dette, fortel Andreas Foss Iversen.

Han har nettopp flytta heim til Husevågøy, og skal opne delikatessebutikk og vinbar i Måløy i år.

– Det er heilt forferdeleg. Ikkje berre for meg som ønsker å satse, men for heile bransjen i Nordfjord.

Linja har betydd mykje

Foss Iversen har sjølv gått restaurant- matfaglinja ved Måløy vidaregåande skule, noko som har betydd alt for han.

– Eg hadde ikkje bestemt meg for å bli kokk. Eg gjekk denne linja fordi det var lokalt, og eg hadde kompisar som skulle gå der. Og så vart det full klaff. Det var engasjerte lærarar og vi fekk mykje erfaring.

Andreas Foss Iversen og lærar ved restaurant- og matfaglinja Bente Iren Vonheim. Foto: Aksel Kjøsnes

Linja er også ein av grunnane til at han valde å flytte heim og starte opp den nye bedrifta.

– Eg har alltid hatt god kontakt med skulen. Og ein av grunnane til at eg ønskte å komme heim og starte opp noko, var for å kunne jobbe saman med skulen. Det er ei god linje og eg veit at lærlingar frå denne linja er ettertrakta, seier han.

Heilt unikt

Kristoffer Westvik Lofnes frå Måløy har også gått denne linja. I dag er han på kokkelandslaget og er kjøkkensjef ved Kulinarisk Akademi.

– Lærarane på denne linja har vore med på å skape min suksess. Dei skjønte tidleg at eg ville satse og ville opp og fram i dette yrket, seier han.

Nettverket som lærarane har bygd seg opp over tid gjorde at dei kunne styre Westvik Lofnes til dei rette folka i bransjen slik at han kunne oppnå måla sine.

– Det finst fleire linjer som kunne gjort det same, men den oppfølginga og det dei brenn for der borte, er så stort og genuint at dei gjer alt for elevane.

– Lærarane har følgt meg frå eg lærte å skrelle poteter til eg konkurrerte i OL. Og då var dei til stades og heia på meg frå sidelinja, fortel han.

I dag er to tidlegare elevar ved linja på kokkelandslaget. I tillegg har Jan Erik Hauge som har gått linja vore på laget.

– Det er godt bevist at den faglege kunnskapen på denne linja er utruleg høg med tanke på kokketalent som dei har fått fram, seier Westvik Lofnes.

Jan-Erik Hauge (t.v.) frå Berle i Bremanger, Tonje Torvanger frå Sogndal, men med far frå Bremanger og Kristoffer Westvik Lofnes under kokke-VM i 2018. Foto: privat

Fryktar at det er slutten

Fylkesdirektøren tilrår at restaurant- og matfaglinja ikkje blir sett i gong frå hausten av. Det vil ikkje seie at linja er lagt ned eller at den ikkje vil starte opp året etter det igjen.

Men bransjen fryktar at dette er starten på slutten for linja.

– Skal alt bli sentralisert no? spør Kristina Kristina Myrseth ved Vestkapp Restaurant og Prestelåna kafe.

Ho har også gått på linja ved Måløy vidaregåande skule.

– Dette er krise og eit yrke som treng vekst. Det er vanskeleg å få tak i kokkar. Vi treng fleire utdanna kokkar og ikkje færre, legg ho til.

Dei nærmaste alternativa for ungdommar som ønsker å gå i denne retninga er i Førde eller Sogndal.

– Det er vanskeleg for desse ungdommane som skal byrje på vidaregåande å flytte langt vekk. Når ein søker på skule søker ein som regel det som er nærmast, seier Foss Iversen.

Dei fryktar at det blir mangel på folk frå Nordfjord som har utdanna seg innan faget og ønsker å flytte heim seinare.

– Om ti år er det plutseleg ingen som har denne kunnskapen eller utdanninga til å gidde å flytte heim igjen og drive med dette. Så då er det jo tapt, seier Foss Iversen.

– Å legge ned linja vil rett og slett føre til færre utdanna kokkar i framtida. Det vil vere eit stort tap for Nordfjord og heile Norge, seier Leon Knapskog.

Han er utdanna kokk og jobbar ved Minibakeriet og er medeigar i Aske gatemat & bryggeri på Nordfjordeid.

Han har sjølv hatt mange lærlingar som har kome frå nettopp denne linja.

– Og i dag er dei kjøkkensjefar og kokkar på flotte restaurantar rundt om i heile Norge.

Ønsker å satse

– I Nordfjord er vi utruleg heldige som har fleire spisestadar med fokus på ekte handverk og gode råvarer. Om vi skal halde fram med å ha slike plassar må vi også ha tilbod som gir kompetanse og inspirasjon til yrket, og kokkelinja i Måløy er ein av dei beste, seier Espen Heia ved Aske Gatemat og bryggeri på Nordfjordeid.

Dette kjenner også fleire i bransjen som reagerer på tilrådinga frå fylkeskommunen seg igjen i.

– Vi er heldige som har folk som torer å satse her. Vi har ei stor utvikling i bransjen på uteliv og kultur, seier Foss Iversen.

– Vi skal jo liksom satse på turisme i Nordfjord og då må vi hugse at unike matopplevingar er noko av det aller beste med å reise, seier Knapskog.