Elevane i første klasse på studiespesialiserande ved Måløy vidaregåande skule har tatt kontakt med Fjordenes Tidende fordi dei har lyst å vise kor stor pris dei set på norsk- og engelsklæraren sin.

Kjekt og praktisk

– Per-Magne er ein fantastisk lærar fordi han jobbar dag og natt og gjer ein heilt utruleg jobb, seier dei.

Ifølge elevane lærer han vekk fagstoffet på ein måte som ikkje gjer det kjedeleg, men interessant og kjekt.

– Han er også ein veldig god lærar og lærer oss faga på ein litt meir praktisk måte, seier elevane.

Per-Magne som kjem frå Haugen i Stad kommune har jobba på Måløy vidaregåande sidan 2001. Han underviser 1sta-elevane i engelsk og norsk og bruker alltid ulike aktivitetar og konkurransar.

– Han er også kjempeflink til å hjelpe sånn at vi forstår kva vi held på med. Han jobbar både i vekedagane og i helgene for at timane og arbeidet vårt skal bli best mogleg.

– Han bryr seg om meiningane våre

Elevane i 1sta meiner også at Per-Magne fortener ei julestjerne fordi han bryr seg.

– Han er også ein lærar som tar mykje ansvar og bryr seg mykje om meiningane våre og korleis vi vil ha det, seier dei og legg til:

– Alle i klassa var einige om at han fortener ei julestjerna med tanke på den gode jobben han gjer som lærar for oss.

– Det er eg som er heldig

Per-Magne blir heilt stille når Fjordenes Tidende ringer.

– Eg blir litt rørt av dette. Det var jo kjempekoseleg av dei å gjere dette. Men det er jo eg som er heldig som får vere saman med dei, seier han.

Han er veldig glad i yrket sitt og å vere saman med ungdom, og set veldig stor pris på julestjerna frå elevane i 1sta.

– Det er gjevande å få vere saman med ungdom og så har eg jo ikkje berre veldig kjekke elevar, eg har dei beste og kjekkaste faga også, ler han.