Jula er ei spesiell tid, også for politiet.
– Det er viktig å tenke på at jula er ei tid for å ha det bra og ta det med ro. Så er det ikkje alle som har det like godt. Det er noko som politiet er på jobb for, om det skulle dukke opp noko. Derfor har vi jobba ned den ordinære drifta. Då kan vi fokusere på det som eventuelt dukkar opp og vere klar til å hjelpe, seier politiinspektør Rognald Dvergsdal til Fjordenes Tidende.
Dei som er på jobb i politiet i Nordfjord i julehelga, romjula og nyårshelga har då alle fått ei viktig oppgåve frå Dvergsdal, som er leiar for politiet i Nordfjord.
– Den ekstra beredskapen i Nordfjord er at ordinære gjeremål som straffesaker og liknande blir tatt ned, og det frigjer kapasitet. Dei som er på jobb i jula har då fullt fokus på det som måtte dukke opp av hendingar.
Vanskeleg tid
Politiet er vande med å handtere ulike kriser, og merkar at jula kan for nokon vere ekstra vanskeleg.
– Vi går i grunnen frå krise til krise. Om det er gjeldskrise, samlivskrise, ulukker eller om det er folk som har slite lang tid og endeleg torer å oppsøke hjelp. I jula kjem dette litt ekstra fram med veldig mange.
Rognald Dvergsdal tykkjer at dei oppdraga der ein må inn i heimane og vere til hjelp kan vere vanskelege, men legg til at det er veldig viktig at dei som kjenner seg utrygge ber om hjelp.
– Det som alltid opptek oss mest i høgtidene er dei situasjonane der vi er nøydde å reise heim til folk. Der det er omstende som gjer at dei i heimane er utrygge, og det kan vere både vaksne og born som kjenner seg utrygge, av ulike årsaker.
– Når kan ein ringe politiet?
– Det kan vere mange ulike grunnar til å ringe politiet, men i all hovudsak har politiet eit ansvar når det gjeld liv, helse og tryggleik. Om folk treng hjelp og kjenner på at dei ikkje greier å handtere det sjølv, må ein ringe etter hjelp. Vi har eit system om som gjer at du får hjelp uansett kva naudnummer du ringer.
Politiet går ut med julehelsing på rim
Det er fleire måtar ein kan nå politiet på.
– Om ein er i naud og treng akutt hjelp skal ein bruke naudnummeret vårt 112. Om ein treng noko anna støtte eller lurer på noko så er det 02800. På arbeidsdagar kan ein også ringe direkte til den lokale politistasjonen, seier Dvergsdal.
Om ein treng nokon å snakke med
Politiet er der om det er ei krise eller om ein står oppe i noko vanskeleg, men Dvergsdal legg til at dei også må gjere prioriteringar når dei skal løyse oppdrag. Og viser til at det også er andre som kan vere til hjelp om nokon har det vanskeleg.
– Vi håpar at folk er kjent med alle dei andre hjelpetilboda vi har i samfunnet som folk også kan kontakte.
Han viser då til hjelpetelefonane til fleire frivillige organisasjonar og helsevesenet.
– Det er mange frivillige som stiller på no i julehøgtida for å hjelpe folk som kanskje berre treng nokon å prate med. Desse hjelpetenestene kan vere til god hjelp, seier Dvergsdal.
Rognald Dvergsdal håpar at jula blir trygg og god for alle i Nordfjord.
– Eg er stolt av å jobbe i Nordfjord. Det betyr mykje for politiet at vi har så mange flotte innbyggarar. Vi er veldig glad for kunne vere til stades for dei. Vi set veldig pris på at folk ringer oss om dei treng hjelp. Vi håpar at jula blir trygg og god for alle, og at alle kan trivst i lag med sine. Dei skal vite dei kan ringe oss om dei treng oss, seier politisjefen i Nordfjord.