– Målet er at vi står på matta i NM neste år, seier trenar Lone Myhre Skavøypoll.
Ho og medtrenar Stine Bøe reiste nyleg saman med troppen til Oslofjord Convention Center på inspirasjons- og motivasjonstur.
Planen var å delta i NM, men på grunn av pandemien blei det mykje fram og tilbake om NM i det heile skulle bli arrangert. Då det endeleg blei bestemt, blei tida litt knapp for troppen til å få ordna alt.
– Men vi bestemte oss for å reise likevel for å vere tilskodarar under NM. Så på turen tenkte vi meir på samhald, teambuilding og rett og slett ha det kjekt saman, seier Myhre Skavøypoll.
Ifølge trenarane var det nyttig å vere til stades under NM. Reint praktisk lærte dei mykje om organisering og dei fekk også eit innblikk i kva som krevst fysisk og teknisk.
– Turnarane var supermotiverte etter helga og sa «no vil vi trene i sju timar kvar veke!»
MIL Cheer fekk også følge med på oppvarminga til seniortroppa i Sirens Cheerdanceklubb der Marie Eide Johansen tidlegare var med.
Ho har vore i Måløy og hatt workshops med cheerdancetroppen fleire gongar, og har stått for både musikk og koreografi dei siste åra.
– Marie har deltatt i VM, EM og har blant anna fire NM-gull, så det er veldig motiverande å lære av henne og følge med på resten av Sirens Cheerdanceklubb, seier Myhre Skavøypoll.
Marie Eide Johansen kjem også til Måløy i framtida for å ha fleire treningshelger.
MIL Cheerdance trakk eit stort publikum til opptredenen ved torget