Den kulturelle skulesekken er i år pakka med eit stort utval engasjerande og varierte opplevingar. Det blir mellom anna kubanske rytmar, samisk verdsmusikk, nynorsk thrillerteater, tidsreiser og museumsbesøk.
Distriktsmusikarane tek mellom anna med seg favorittlåtane sine til barneskular i Nordfjord, og Good Time Charlie byr på blues i nynorsk språkdrakt. Sogn og Fjordane Teater skal vidare til alle ungdomsskulane i Nordfjord med stykket Invasjon. Tema her er kampen mellom tillit og fordømming, og stykket stiller spørsmål om fryktretorikk og framandskepsis i eit multikulturelt samfunn.
Ei anna storsatsing i årets skulesekk er kulturarvtilbodet «Tidskapselen», som går til alle 9.-klassingane i fylket frå og med denne hausten. Saman med Musea i Sogn og Fjordane har DKS utvikla eit tilbod der målet er at elevane skal bli betre kjende med kulturarv og museum i nærmiljøet sitt.