– Mange vart rørt og gode klemmar var utveksla då vi møttest og utover kvelden, fortel Leif Ramsevik, som deltok på jubileet for konfirmantane frå vestre krets, øyane i sør og Deknepollen.
Dei to gruppene hadde separate markeringar, men dei hadde også nokre felles programpostar, som treff på Jibben fredag og gudsteneste i Sør-Vågsøy kyrkje søndag.
– Det vart ei spesiell og fin gudsteneste med mykje song og musikk, seier Ramsevik.
Gruppa frå Måløy hadde blant anna presentasjon av Lefdal Mine Data Center/«Måløy-miljøet» ved Sindre Kvalheim og busstur rundt øya med Knut Ole Frantzen som sjåfør og Turid Breidalen som guide på programmet. Laurdag kveld var det fest på Røde Kors-huset for dei 30 som deltok på konfirmanttreffet.
Gruppa frå vestre krets, øyane i sør og Deknepollen utveksla mange gode historier om tida under og etter konfirmasjonen, og Karin Nordvik tok dei tilbake til konfirmasjonstida og presten Sigurdur Torsteinsson. Laurdag ettermiddag var det jubileumsfest i ASVO sine lokale på Kulen for dei 30 som hadde høve til å delta.
– Totalt sett eit svært vellukka arrangement som gjekk knirkefritt. Nokre tok til orde for ei markering også neste år, fortel Ramsevik.