Namn: Hilde Hagen
Alder: 56
Adresse: Kulen
Sivilstatus: kjærast
Yrke: lærar
Hobby: song, musikk, fjellturar og strikking
Aktuell med: er ein av instruktørane på Skavøypoll skule si oppsetting Nisse på ville vegar måndag 18. desember
– Kva er "Nisse på ville vegar"?
– Det er ein musikal der vi møter nissane på ein verkstad. Ein dag er dei ute i skogen og leikar når ein av nissane fell. Nissebarnet mister hukommelsen, men så møter han heksa Agnes som som får han til å kunne snakke med alt som lever - dyr, mennesker og skogen. Nisse vandrar rundt og møter mange ulike skapningar. Til slutt blir han råda av grana til å gå til byen å møte menneska der.
– Er det tradisjon på skulen å sette opp ein musikal?
– Ja, vi har hatt musikalar på Skavøypoll skule i mange år. Nokre har vore i Samfunnshallen og nokre i gymsalen. Årets musikal krev mykje plass, så i år blir det i Samfunnshallen.
– Kor mange elevar er med på oppsettinga?
– 62 elevar frå 5., 6. og 7. klasse er med. Dei er scenearbeidarar, kulissearbeidarar, skodespelarar, dansarar og solistar. I tillegg har vi dei som har arbeider med kostyme, lyd og lys.
– Kva syns elevane om å vere med på musikalen?
– Dei synst det er veldig kjekt. Elevane har sjølv søkt på roller og arbeidsoppgåver. Det er jo ikkje alle som vil stå på scena.
– Kor lenge har de øvd?
– Vi har øvd sidan oktober. Elevane har lagd kostymer og kulissar sjølve, og lærarane i storskulen har vore instruktørar. Gjennom dette arbeidet får elevane øving i blant anna norsk, kunst og handverk, musikk, venskap, etikk og moral.
– Kvifor skal folk kome og sjå denne musikalen?
– Fordi ungane gjer ein fantastisk jobb. Det er verkeleg verdt å kome. Kulturlivet i Vågsøy er stort, også blant barn når vi trur på dei. Vi har kava litt, men ungane har verkeleg stått på. Dei har så inderleg godt av å stå på ei scene.
– Har premienervane meldt seg?
– Det er nok litt småstress både hos elevar og lærarar, men vi gler oss veldig.
– Kor mange har de plass til, og kven passar dette for?
– Vi har plass til om lag 700 personar. Dette er ei førestilling som passar for alle. Både store og små.