Festivalleiinga i Malakoff Rockfestival er budde på både skryt og kjeft etter framlegginga av årets festivalprogram.
– Vi har vore litt meir vågale i bookinga, noko eg meiner er spanande. Eg meiner det er ein viktig del av det å henge med i utviklinga, seier festivalsjef, Arnt- Ivar Naustdal.
No er alle artistane klare
– Det er nok ein sju-åtte ting som mange ikkje kjenner til, men dette er verkeleg ukjente skattar, som eg trur kan by på nokre overraskingar frå scena, fortel Naustdal, som er budd på både positive og negative tilbakemeldingar på årets program.
Sjølv om det skulle bli både kjeft og skryt, er det ikkje vanskeleg for Naustdal å trekke fram nokre favorittar.
– Gogol Bordello er eit strålande liveband som skapar fantastisk stemning. For dei som var på fjorårets festival kan ein trekke likskapar til Hofmeistro sin konsert. Gogol Bordello er umiddelbart lett å like. Ein kan heller ikkje unngå å nemne rockelegenda Iggy Pop. Dette blir ein fantastisk konsert både for nye og gamle fans, seier han, og legg til:
– Odd Nordstoga kunne spelt på Malakoff Rockfestival i mange år. I tillegg har vi Gojira som er så hardt som du kan få det. Mange vil syns det er heilt fantastisk, medan andre vil legge inn ei pause.