Dei sikra seg billett vidare til fylkesmønstringa etter laurdagens UKM (Ung kultur møtast) i Eid. I alt var det 28 deltakarar fordelt på 16 sceneinnslag med, samt to bildeutstillingar.
– Det er eit lågare tal enn tidlegare år, men dette er jo varierande, seier Dan Aasebø ved kulturskulen i Eid.
På scena kunne ein mellom anna høyre piano og fiolin, sjå klassisk ballett og drill, og høyre hardrock.
Nyttig erfaring
Jackbow var den einaste gruppa som deltok på UKM, og bandet består av Andreas Espe-
lund (gitar), Håkon Henjesand (gitar), Jakob Hagen (bass), Sigurd Rønnekleiv (trommer) og Peder Naustdal (vokal). Naustdal fortel at dei har lyst å spele musikk saman så lenge som mogleg. Han trur UKM kan vere ein fin plass å vise seg fram på.
– Nokre av oss har vore med før, men vi har aldri delteke saman som band. Vi trur at all erfaring er god erfaring, så derfor meldte vi oss på, fortel vokalisten.
Eitt år saman som band
Naustdal forklarar at bandet allereie har gjort nokre småjobbar, sjølv om dei berre har spelt i lag i eitt år.
– Vi har spelt litt rundt om kring, til dømes i Gymmen og i idrettshallen, fortel han.
– Det kjem litt tilbod her og der, så det lovar jo bra, ler Naustdal.
Draumen til gutane er å få spele musikk så lenge det let seg gjere. Naustdal fortel at dei har fått gode tilbakemeldingar etter laurdagens prestasjon, kor dei serverte ein eigenkomponert rockelåt til publikum.
– Vi skriv omtrent alle songane våre sjølv, og jobbar i lag om tekstane. Songane handlar om alt mogleg, men vi vil ikkje skrive om kjærleik og slike ting, fortel fjortenåringen.
Fokuserer på uttrykk
Naustdal og resten av bandet skal no starte oppkøyringa mot fylkesmønstringa. Den går av stabelen i Høyanger, 31. mars til 2. april.
– Vi møtast allereie opp mot fire gonger i veka på Gymmen og øver, så no kjem vi til å fokusere mest på uttrykk.
Han meiner måten ein uttrykker seg på er viktig når ein står på scena.
– Dersom ein berre står der blir det jo veldig kjedeleg for publikum. Spesielt når det er rockemusikk, då kan ein ikkje stå i ro! understrekar vokalisten.
– Kvalitet over heile linja
Dan Aasebø er rektor ved kulturskulen i Eid, og trekk særleg fram variasjonen blant årets deltakarar.
– I år er det ei jamn fordeling og mykje variasjon, og det er kjekt! Dessutan er det kvalitet over heile linja, påpeiker han.
Likevel skulle Aasebø gjerne ha sett fleire deltakarar på scena
– Det har vore lit færre påmelde i år, men det skuldast nok alt det andre som skjer her, fortel han.
Han fortel at mellom anna ulike musikalar og revyar er tidkrevjande for elevane.
– Ting krev sitt, og eg har inntrykk av at ungdommane i Eid er ganske opptatt, smiler Aasebø, som likevel har trua på fleire påmelde til neste år.
Årets jury bestod av Grethe Berntzen (kulturskulen i Bremanger), Atle Oen (musikklærar i Eid), samt tre representantar frå ungdomsrådet: Susanne Rønnekleiv, Dagny Sunde og Ingvild Stautland. Dei sendte følgjande seks innslag vidare til fylkesmønstringa i Høyanger: Szymon Matusiak (piano), Nephente (song og gitar), Sara Frislid (drill), Jackbow (rockeband), Ida Bredesen og Tuva Nyhammer–Taklo (dans) og Marshalena Antony (utstilt måleri).