Aksel Hauge Vedvik (12) frå Bremanger er ein av ti finalistar i årets Melodi Grand Prix Junior.
Låten han skal delta med har Aksel skrive sjølv, og den heiter «Ingen ting å tape». Over 600 bidrag, som er ny rekord for NRK, blei i år sendt inn, og Aksel sin song var ein av desse.
– Låten førte til at han blei kalla inn til songaudition på NRK i mars saman med 24 andre bidrag, fortel Silje Marie Lien som er presseansvarleg for MGPjr 2014. Av desse 25 kapra Aksel ein av ti finaleplassar.
Finalen går av stabelen i Oslo Spektrum laurdag 30. august, og blir sendt direkte på NRK1.
– Men MGPjr – reisa startar allereie no – med studioinnspeling, leirskule og andre aktivitetar, seier Lien, som røper at finalistane har fem fantastiske månader framfor seg.
– Og til slutt skal dei ta publikum og tv-sjåarane med storm i eit fullsett Oslo Spektrum, seier ho.
Aksel går i sjuande klasse ved Hauge skule. Han speler gitar, i band og i korps. Han likar å skrive, turne, lage musikk og teikne.
Aksel var også med i UKM i år med bandet sitt «AKV and the Freakz» der han speler med venene Sigve Holm Sæterlid og Vebjørn Solberg (13) på gitar.
I MGPjr stiller han derimot som solist, og i låten «Ingenting å tape» syng han om at det ikkje gjer noko om folk synst han er annleis. Han må få vere som han er for å få til det han vil.
Programleiarar for MGPjr 2014 er Margrethe Røed og Tooji.