Og det var fleire enn Guro som var storfornøgde etter konserten for utviklingshemma, fredag. Godt og vel 60 brukarar pluss ledsagarar møtte opp og fekk med seg årets nysatsing under Elvisfestivalen.
– Dette er eit kjempetilbod eg veit mange set pris på, seier Ola Ødegård frå miljøtenesta i Stryn, som hadde med seg 18 brukarar til Måløy.
– Dette er mennesker som er glade i musikk, og dei vi har med har i alle fall gleda seg sida byjinga av sommarferien.
Eit takknemlig publikum
Isak «Elvis» Søraa spelar gjerne på liknande arrangement fleire gongar.
– Som artist er det aller viktigaste å få kontakt med publikum, og her i dag var det verkeleg ikkje noko problem i det heile. Elvisfiguren er fantastisk å bruke i ein slik setting, seier Søraa som både framførte sangnummer nede blant publikum, dansa på bordet og inviterte nokre ekstra heldige opp på scena for å spele luftgitar.
– Ein ser gleda i auga deira, og dei viser at dei set pris på det som vert gjort for dei. Det er ein veldig givande og takknemleg jobb å opptre framfor eit slik publikum.
Kai Martinsen var også med på konserten, og spelte kjende country-slagera til stor glede for dei swing-glade i salen. Også han inviterte publikum til å ta del på scena, og fekk med seg fleire solistar i løpet av konserten.
– Dette var fantastisk morro, publikum gir verkeleg noko tilbake. Eg storkosa meg gjennom det heile, seier han.
Famnar om alle
Lars Kjølen i Elvisfestivalen var ein av initiativtakarane til konserten, og hadde også berre lovord å seie om arrangementet.
– Eg var veldig optimistisk, og sikker på at dette skulle bli suksess i forkant, og hadde håpa på mellom 20 og 30 påmeldte. Det kom omlag det dobbelte, så eg tenker vi kan seie det blei ein storsuksess, seier Kjølen nøgd.
– Vi har fått veldig gode tilbakemeldingar, så eg ser ikkje vekk i frå at det vert arrangert ein liknande konsert neste år.
Kjølen fortel at Elvisfestivalen rettar fokus mot dei gruppene i samfunnet som ofte fell litt utanfor ved store begivenheiter og festivalar.
– Vi starta med konsert på Kulatoppen og Skaretun i fjor, og i år har vi sett opp denne konserten i tillegg. Vi vil vise at Elvis famnar om alle.
Kjølen understrekar at kommunen og alle ledsagerane gjorde ein strålande innsats og at der var deira planlegging i forkant som gjorde det mogleg å gjennomføre konserten.