Svelgen Songlag vil arrangere stor 90-års jubileumskonsert neste år.
Svelgen Songlag blei stifta i 1927, og dette vil dei feire som seg hør og bør med jubileumskonsertar i både indre og ytre Bremanger.
Hovudkonserten vert i Svelgen, der tidlegare dirigentar og kormedlemmar også vert invitert til å vere med. Den andre konserten vert på Hauge i Bremanger.
- Vi kjem til å ta for oss ei reise gjennom historia til songlaget. Klassikarar opp gjennom tidene vert framført, men også glansnummera til tidlegare arrangement vert på tapeten, skriv songlaget ved Linn Sande Igland i brev til Bremanger kommune.
No søkjer dei kommunen om 73.500 kroner i midlar for å dekke utgifter til arrangementa.
I dag er det tjue songglade medlemmar som er med, og eit fyrverkeri av ein dirigent i Grete Berntzen.
Songlaget har hatt fleire oppsettingar tidlegare, både åleine og ilag med andre aktørar. Dei har mellom anna samarbeidd med Bremanger Musikklag med oppsettinga av Beatles-klassikarar, og gjesteopptreden med Koriander frå Eikefjord på Operahuset på Eid.
- Men dessverre har det seg slik at dei to siste åra har koret fått med eit lite underskot på budsjettet. Derfor søkjer vi kommunen om prosjektmidlar for å kunne gi koret den merksemda det fortener ved eit slikt jubileum, skriv dei.