Det skulle ha vore meir KrF-politikk i budsjettet som vart lagt fram for kort tid sidan, eit budsjett som kunne ha vore meir sosialt og som kunne teke vare på dei som har det vanskeleg økonomisk i vårt velstandssamfunn.
Etter snart eit år med stigande prisar på dei fleste område hadde det gjort seg om regjeringa kunne ha prioritert dei som har det tøft økonomisk på ein betre måte.
Mykje av dette kunne ha vore gjort på ein enkel måte, som med støtte til straum og drivstoff. Regjeringa kunne ha sett ein fastpris på straum med makspris på 50 øre per kilowattime. På same måte kan ein setje ein pris på drivstoff.
Det som er vanskeleg å forstå er at det å hjelpe folk som slit med å klare å betale rekningane er inflasjonsdrivande, mens staten samtidig tener store summar på dei høge prisane. Dette burde brukarane ha fått tilbake.
Samtidig som mange har det vanskeleg, så kuttar regjeringa ned på støtta til frivillige organisasjonar som Kirkens Bymisjon, Blå Kors og andre organisasjonar som driv med sosial utjamning.
Det som hadde vore greitt var om regjeringa kunne ha kome med ei julegåve til dei som slit mest på grunn av aukande prisar.
Det er også litt rart at dei som styrer landet ikkje vil møte opp på debattprogrammet på NRK TV der programleiar Fredrik Solvang tek opp nettopp desse tinga. Auka barnetrygd og andre støtteordningar som bustøtte ville ha vore ei god hjelp.
Når bistandsbudsjettet for neste år også er redusert med 16 milliardar kroner seier det litt om retninga vi går i.
Eg håpar at dei som styrer landet vårt kan komme med ei ekstra julegåve, slik at alle kan sjå jula lyst i møte. Vi har råd til det.