Fredag 31. mars var fristen for å levere listeframlegg til kommunestyre- og fylkestingsvalet 2023.
Det kan vere fleire årsaker til at nokon vegrar seg for å stille til val. I tidlegare tider kunne kommunestyremøte vare til langt på natt. Sjølv om mykje har endra seg til det betre med både møtekultur og møteleiing, er her framleis element som kan vere ei utfordring for demokratiet.
Før sjølve kommunestyremøtet er det i nokre kommunar sett av rikeleg med tid til orienteringar og politikaropplæring. Begge deler er sjølvsagt viktig for at dei folkevalde skal få eit best mogleg grunnlag for å gjere vedtak i dei politiske sakene. Orienteringar frå både politisk og administrativ leiing høyrer sjølvsagt til på sakskartet, men når opp til halve møtedagen er sett av til orienteringar kan det bli vel mykje.
Før sjølve kommunestyremøtet hender det at også eksterne organisasjonar er invitert inn til å snakke for eit samla kommunestyre. Folkevalde treng vite kva som rører seg i kommunen. Det kan vere nyttig å få ei detaljert forklaring på kva som ligg bak alle tala i eit budsjett, men må det alltid gjerast i forkant av eit kommunestyremøte? Det kan fort bli for mykje informasjon, og for lite tid til diskusjon.
Kommunestyra har blitt flinkare til å sette eit endeleg tidspunkt for møteslutt. Det er bra for å sikre at også til dømes småbarnsforeldre er representert i folkevalde organ. God møteleiing og førebuing før møta har det vore fokus på for å gjere møta meir effektive. Likevel går den tilmålte tida til vedtakssakene fort, og då innfører ein avgrensa taletid.
Kvifor er det debatten som skal effektiviserast og kortast ned på? Kvifor snur ein ikkje heilt om, og startar møta med dei viktige vedtakssakene? Å knipe inn på diskusjonen til fordel for informasjonen er ein trussel mot demokratiet.