Les Marita Aarvik sitt innlegg som sto på trykk i mandagens papirutgåve av Fjordenes Tidende.
Marita Aarvik sendte inn innlegget på vegne av LHL Sogn og Fjordane og i debattinnlegget tek ho opp ambulansesituasjonen i Sogn og Fjordane.
Ope brev til Helse Førde/Helse Vest
I samband med framlegg til endring i ambulansesituasjonen i Sogn og Fjordane.
Det er med den største uro LHL Sogn og Fjordane har registrert at Helse Førde ønsker å kutte drastisk i ambulansetenestene i fylket.
Vi merkar oss at økonomi er ei av drivkreftene for framlegget. Det er i framlegget til ny ambulanseplan snakk om at ambulansetenesta skal vere berekraftig. Etter vår meining er det størst berekraft i at personar får rask hjelp og kan kome rakt tilbake til god helse og arbeid.
For hjerte-, kar- og lungesjuke er tidsramma ofte knapp.
Helse Førde har enno ikkje innført tilbod om trombolyse til sine pasientar, sjølv om dette er vanleg i andre fylke i landet med lange avstandar til PCI behandling. For dei som ikkje har nytte av denne behandlinga, hastar det enno meir å kome raskt til sjukehus. Når vêrtilhøva gjer til at ikkje luftambulanse kan rykke ut, vil desse pasientane få eit svært dårlig utgangspunkt og som vil bli betydeleg verre med dei nye omleggingsplanane.
Det har dei siste par åra vore eit sterkt fokus på hjerneslag. Det har vore eit viktig mål at folk skal lære seg å kjenne att teikna på dette. Dette hjelp lite når det tek veldig lang tid til ambulanse er på plass for å bringe pasienten til sjukehus for CT-scanning. Vi veit alle at til lenger tid som går, til større skade vil dette medføre på hjernen og som i neste omgang vil kunne gi store samfunnsøkonomiske kostnader.
Dermed vil vinninga fort gå opp i spinninga om vi ser på det store bildet.
Vi kan ikkje på nokon måte akseptere at dårlige pasientar skal få endå lenger ventetid på hjelpa i Sogn og Fjordane. Vi er eit fylke med mykje fjell og med mykje smale og svingete vegar som det tek lang tid å forsere. Gale på bar veg og mange gongar nesten umuleg på glatte vintervegar.
Døgnambulansane slik dei er i dag, er eit minstekrav for oss, og vi bed om at vårt brev vert teke med i styra si behandling av denne saka.
Ønskjer du å delta i debatten? Send ditt innlegg til fjt@fjt.no