«Det er uforståeleg at det ligg ein ferjelem her som ikkje kan nyttast»

Ferjelemmen i Smørhamn må settast i stand og nyttast

Ferjelemmen i Smørhamn i Bremanger har vore ei viktig sak for meg og KrF lenge.

Det er heilt uforståeleg at det ligg ein ferjelem i Smørhamn som ikkje kan nyttast.

Det er mest dagleg reisande som har bruk for ein lem for å komme på land og om bord.

Eg var på kontoret til ordføraren og snakka om denne saka for fleire år sidan, men ingenting har skjedd.

Sjølv reiser eg ofte med hurtigbåten mellom Måløy og Florø, og svært ofte er det bruk for ein ferjelem. Landgangen er bratt ned frå kaia og folk må ha hjelp både opp og ned.

Etter at Smørhamn ferjekai vart stengt kan ein heller ikkje ta bilar om bord i Kystvegekspressen som går i rute mellom Måløy og Florø.

Ikkje minst om vinteren når det er dårleg føre er det viktig at det finst ein moglegheit til å ta med bilar på Kystvegekspressen frå Smørhavn til Florø. Det er plass til fire personbilar på MS Sylvarnes som trafikkerer denne ruta, og det var so mykje enklare før når ein kunne køyre om bord i båten og vere i Florø på ein halvtime.

Dette er ei viktig sak for ein kommune som vil stå fram som ein servicekommune.

Det er mange med meg som ynskjer ein fungerande ferjelem i Smørhamn, og eg håpar Bremanger kommune ikkje berre lar byråkratane styre, og at dei no kan ta tak i denne saka.