Redningsselskapet og Hovudredningssentralen har no gitt sine fråsegner om viktigheita for at Stad skipstunnel må byggjast for å få ein sikker og saumlaus seglas for alle dei 11–12.000 fartøy som årleg bruker den indre skipsleia forbi Stad.

Dei to selskapa RS og HRS i lag med Sjøforsvaret (som har vist til den strategiske fordelen i ei konflikt), har no stadfesta kor viktig Stad skipstunnel er for desse maritime gruppene som opererer langs vår langstrekte kyst.

Vi håper med dette å vise kor viktig Stad skipstunnel er for heile den norske maritime næringa sånn at den ikkje blir sett meir på vent og arbeidet fortset med full styrke.

Hovudredningssentralen understrekar viktigheita av nødvendige tiltak og ressursar på plass for å handtere eventuelle hendingar som kan oppstå. Dette er element som Kystverket også er opptatt av.

Her er fråsegna fra RS:

«Redningsselskapet er positiv til alle tiltak som kan bidra til å bedra sikkerheita langs kysten. Stad skipstunnel er i så måte et svært spennande prosjekt som vil kunne bidra til å redusere risikoen knytt til passering av Stadhavet.

Vi har ikkje inngåande innsikt i dei analysar som ligg til grunn for korleis ein skipstunnel i framtida vil påverke fritidsflåten, fiskeri og annan kommersiell trafikk langs dette vêrutsette området, men antar likevel at ein skipstunnel på Stad vil kunne bli et reisemål i seg sjølv.

Det er derfor naturleg å anta ein trafikkvekst i området, noko som igjen vil kunne vere argument for at RS framleis er i området, men med potensielt andre typar kapasitetar eller eigenskapar.

Redningsselskapet følger prosessen og dei politiske avgjerdene knytt til ein komande skipstunnel, og vil alltid følge opp og dimensjonere vår beredskap for å møtekomme dei til ein kvar tid gjeldande behov. Redningsselskapet vil inntil vidare fortsette å alternere mellom stasjonane i Måløy og Florø, og vil i løpet av året styrke vår beredskap i området med ein skøyte med noko økt slepekraft og betre sjøeigenskapar».

Her er fråsegna fra HRS:

«Hovudredningssentralen erkjenner viktigheita av sjøtryggleik og ser både fordelar og risiko knytt til Stad skipstunnel. Som ei generell haldning støttar me infrastruktur som bidreg til å sikra og forbetra tryggleiken til sjøfarande. Ideen om å tilby ei alternativ rute for mange fartøy ved å unngå den utfordrande havstrekninga utanfor Stad er god. Likevel må me også erkjenna at ein skipstunnel representerer ein innbygd risiko i seg sjølv.

Det er viktig å vera merksam på moglege utfordringar og hendingar som kan oppstå inne i tunnelen, til dømes skipsbrann eller behovet for anna redningsinnsats. Hovudredningssentralen er for ein trygg og effektiv maritim infrastruktur, men me understrekar også betydninga av å ha nødvendige tiltak og ressursar på plass for å handtera eventuelle hendingar som kan oppstå i ein slik skipstunnel. Slike utfordringar må grundig kartleggjast og handterast i alle fasar av eit tunnelprosjektet, inkludert prosjektering, utbygging og drift.

Det er difor Hovudredningssentralen sitt synspunkt at balansen mellom fordelane ved ei alternativ sjørute og risikoen knytt til tunnelen må vurderast».