Kinn blir grønare med Venstre

Med Venstre i førarsetet har Kinn kommune vedteke svært ambisiøse mål for klima og naturmangfald. Resultata og tiltaka er mange. Venstre har store ambisjonar for ei grønare framtid. Kinn blir grønare med Venstre.

I temaplan for klima, miljø og naturmangfald har kommunestyret vedteke mange konkrete tiltak for at Kinn innan 2030 skal ha stoppa tap av naturmangfald og blitt ein nullutsleppskommune.

I 2018 fekk Flora kommune Zero sin pris for beste lokale klimatiltak, gjennom arbeidet med nullutslepps båtrute mellom Florø og Måløy. Den politiske drivkrafta bak dette var Venstres Jan Henrik Nygård. Jan Henrik er også ein av dugnadskreftene bak utviklinga av friområdet på Sørstrand Folkepark.

Når uteområdet på Florø ungdomsskule no tek form, slik også Lilleåsen står fram som ein nyslipen diamant, er det også fordi Venstre har engasjert seg i å finne midlar og prioritere desse tiltaka. Slik har kommunen bygd opp under den store dugnadsinnsatsen som realiserer trivelegare og grønare lokalmiljø. Saman får vi det til. Når vi lagar slike turstiar og grønområde nær folk, så gjer det også at belastninga på naturen elles blir mindre. Til glede for plantar og dyr.

På forslag frå Venstre i Kinn arbeider staten no med å gjere om Ålfotbreen landskapsvernområde til nasjonalpark. På Svanøya og i Osen blir det gjennomført viktig frivillig skogvern, som Venstre heiar på. Venstre har tidleg utfordra statsforvaltaren på å utvide Stad marine verneområde (som strekker seg inn i Kinn) fordi vi ser verdien dette verneområdet representerer for framtidige generasjonar.

Når Gate 1-prosjektet gjev Måløy ein flott facelift, har Venstre pusha på for at ein må ta vare på dei store bytrea og andre grøntkvalitetar. Det same har vi gjort i Kirkeparken i Florø.

For nokre er strenge miljøkrav noko usikkert. I Kinn kommune representerer det grøne tvert imot tryggleik for arbeidsplassar. Heile næringslivet vårt ligg langt foran andre og omstiller til fornybarsamfunnet. Når vi viser fram det grøne og framtidsretta næringslivet vårt til våre politikarar nasjonalt gjer vi det med hornmusikk i brystet, imponert over alt næringslivet i Kinn får til. På område etter område er næringslivet i Kinn fremst i verda på grøn omstilling!

Samtidig som Kinn er ein av dei fem kommunane i landet som har innvilga flest byggesøknader i strandsona i 2022, så får vi samstundes skryt frå statsforvaltaren for måten vi arbeider med arealrekneskap og forvaltar strandsona og arbeid mot nedbygging av myr og andre viktige naturtypar.  I Kinn viser vi nemleg at det ikkje er noko motsetning mellom bruk og vern, berre det skjer med klokskap.

Lista over gjennomførte tiltak er lang. Og Venstre har store ambisjonar for ei grønare framtid:

- Vi må følgje opp temaplanen for klima, miljø og naturmangfald med konkrete tiltak. Vi må aldri kvile på at planen er god, den er berre god om vi følgjer opp i praksis og alltid setter oss stadig meir hårete mål og viser at vi følgjer opp!

– Når Markegata skal rustast opp må vi gjere det vi kan for å legge delar av gata under bakken, slik at vi kan lage 6.000 kvadratmeter ny grøn park midt i Florø. Barn og unge i heile kommunen skal vakse opp med grøntområde lett tilgjengeleg, både det tilrettelagte og det ville.

-  Vi må gjere det lettare for folk flest å spele på lag med natur og klima. Då må vi ha eit NOMIL som fungerer, ikkje som irriterer. Vi må legge til rette for ENØK-tiltak i kommunale bygg og privatbustader, som Venstres Hilmar Eliasson i sak etter sak har vist at er bra også for kommunen sin økonomi. Vi må stille krav til utbyggjarar om gode grøne kvalitetar for trivsel, naturmangfald og klima.

Vi i Kinn Venstre kunne ha skrive mykje og langt om alt vi vil gjere, og dei beste ideane for å gjere Kinn grønare er framleis ikkje tenkt. Om du stemmer på Venstre vil vi gjere det vi kan for å løfte alle gode krefter som vil gjere Kinn grønare. Saman skal vi vise at i Kinn, der skapar vi grøne og levande lokalsamfunn for alle.