Torsdagens nyheit om at delar av arbeidet med Stad skipstunnel blir sett på vent er eit hån mot næringslivet langs heile norskekysten. Vi er sjokkerte og ikkje lite forbanna. Dagens «Oslo-regjering» ser ikkje kvar i landet store delar av verdiskapinga skjer.
Vi snakkar fint om grøn omstilling, vi snakkar om kva vi skal leve av etter oljen. Er dette berre tomt prat? I gjeldande NTP skal 97 prosent brukast på transport til veg og bane, men berre 3 prosent til sjøvegen. Stad skipstunnel er eit grønt prosjekt, meir gods frå veg over til sjø, vi får moglegheiter for grønare skipsfart, risikoreduksjon vedk. ulukker og tryggare og sikrare ferdsels- og arbeidsvilkår for dei som har sin næringsverksemd og ferdsel til sjøs.
I tillegg bidrar Stad skipstunnel til utvikling av sårt trengt næringsareal, verdiskaping og investering på land. Involverte kommunar har allereie brukt 70 mill. kr på regulering, i tillegg kjem alt arbeidet som er gjort rundt; tilrettelegging, førebuing, ringverknadsanalysar og forprosjekt. I tillegg har folk flytta frå heimane sine.
Prosjektet er greia ut frå alle vinklar. Mykje av kostnadsauken som vi er vitne til i dag er knytt til generell prisvekst, og høgde for risiko. Alle store investeringsprosjekt blir ramma av høgare prisvekst. Samtidig prioriterer fagfolka i Kystverket arbeidet med å få ned risiko-relaterte kostnader. M.a. skal ein prøvebore fjellet for å få meir kunnskap om fjellkvaliteten.
Dette er ikkje eit lokalt prosjekt, men eit nasjonalt viktig prosjekt for svært mange. Vestland fylke, Møre og Romsdal fylke, LO, NHO, Noregs Fiskarlag, Kystrederiene, Bellona samt næringsforeiningar langs heile kysten har peika på kor viktig Stad skipstunnel er for deira næringsutvikling og verdiskaping.
På vegner av næringslivet krev vi at regjeringa snur på dette. La oss få prosjektet ut på anbod slik at vi kan kome i gang med omstilling og verdiskaping. Det treng Norge!