Bruk stemmeretten

I dag er det ei veke att til kommune- og fylkestingsvalet, og alle lokalparti har i valkampen løfta fram viktige og gode saker dei går til val på. Bulyst og rekrutteringstiltak har vore peika på som særs viktig for alle parti. Kva vi skal prioritere framover vert ei sak som det nye kommunestyret skal ta stilling til, og Bremanger Ap ynskjer å vere i posisjon og i førarsetet i dette arbeidet.

Bremanger Ap har i vedteke program for dei neste fire åra peika på mange viktige saker som vi vil realisere i kommande periode. Gode kommunale tenester til det beste for våre innbyggjarar er ei av våre viktigaste saker.

Arbeid, bustad og fritid er tre viktige tema som vi må utvikle for at Bremanger kommune i framtida skal ein trygg stad å bu, og ein god plass å flytte til.

Mykje er under arbeid av positive tiltak som vil bidra til auka trivsel og betre tilbod for både innbyggjarar og besøkande. Nokre eksempel på dette er:

1. Parkeringstilhøva ved Svelgen kapell, vert realisert i haust.

2. Snuplass og betre parkering ved Berle kyrkje vert realisert i haust.

3. Parkeringsplass i Hamnen skal stå ferdig i september.

4. Arbeid med nytt vassverk i Svelgen.

5. Skisser for sanitærbygget ved Grotlesanden er klar i løpet av september, og arbeidet med realisering av parkeringsplass skal arbeidast med denne hausten.

6. Ny heimeside for Bremanger kommune vert aktivert før nyttår.

7. Arealplan for Iglandsvik er ute på høyring.

8. Trinn 1 på uteområda ved Svelgen, og Hauge skule er realisert etter at Bremanger Ap har løfta dette fram som ei viktig sak i budsjett arbeidet. Trinn 2 vert gjennomført i 2024.

9. Bremanger Ap har i arbeidet med arealplanen fått på plass grøntarealet i Svelgen sentrum. Vi ønskjer i kommande periode å arbeide vidare med plan for utvikling av området, i tett dialog med grunneigarar, Svelgen Opp og Fram og andre interessentar.

10. Vi vil fortsette arbeidet med å styrke samarbeidet mellom kommunen og frivillige lag- og organisasjonar for å sikre utvikling og gode aktivitetstilbod i bygdene.

Av bulyst- og rekrutteringstiltak har vi bedt om innspel frå arbeidstakarorganisasjonane, og håpar på mange gode innspel frå dei. I programmet ønskjer vi redusere, eller ta bort, eigedomsskatten og greie ut tiltak som nedbetaling av studielån for unge som flyttar heim. Gratis barnehage kan vi vere opne for å vurdere, men også dette må utgreiast nærare med omsyn til sannsynleg effekt.

Når det gjeld Holmanesprosjektet, så er Bremanger Arbeidarparti innstilt på å stelle oss til den prosessen det er lagt opp til. Det er ikkje no vi skal ta stilling til om dette prosjektet skal realiserast eller ikkje. Dette vil ifølgje planprogrammet tidlegast skje i juni 2024. Men før det kjem vedtak av planprogrammet no den 7. september og så 1. gangs behandling av planforslaget rundt årsskiftet. Deretter kjem ei ny høyringsrunde og så 2. gangs behandling av planforslaget i juni 2024. Det er først då områdereguleringa skal opp til endeleg avgjerd.

Bremanger Ap har unge nye kandidatar, dyktige godt vaksne menn og knakande flinke damer som stiller til val ifrå store delar av kommunen vår.

Vi har trua på at vi med Arbeidarpartiet i førarsetet kan klare å snu den negative folketalsframskrivinga vi no ser framfor oss. Dette får vi til om vi arbeider godt i lag, og satsar på medborgarskap.

Bruk stemmeretten, godt val!