Uttale til regjeringa sitt forslag om auka skattlegging av kraftproduksjon.
Sogn og Fjordane Holding AS (SF Holding) vil peike på dei uheldige konsekvensane den skjerpa kraftbeskatninga har å seie for:
kraftselskapa si evne til å investere i fornybar energi,
og at store verdiar vert sentraliserte frå eigarkommunane til staten.
Som majoritetseigar i Sogn og Fjordane Energi (SFE) ser vi at dette framlegget vil medføre at investeringar i fornybar energi, som bidreg til å løyse energikrisa og legg grunnlaget for framtidig lokal verdiskaping, stoppar opp. Lønsemda i desse investeringane blir no redusert. SFE har to planlagde prosjekt som må vurderast på nytt i lys av endra skattlegging. Eigarane i SFE har tidlegare vore med i eit omfattande investeringsprogram gjennom emisjon for å bidra til ein nasjonal etterspurt auke i produksjon av fornybar energi.
Framlegget medfører også ei omfordeling av store verdiar frå eigarane av kraftselskapa til staten. For eigarane i Sogn og Fjordane Holding AS betyr det ei overføring frå distriktskommunar til sentrale strok. Det vil bli negative konsekvensar for økonomisk resultat, investeringsevne, utbytte og verdiskaping i regionen.
Styret i SF Holding ber difor om at følgjande to endringar blir prioritet justert:
Grunnrenteskatten må reduserast til maks. 40 %, for ikkje å straffe selskap i område utan spesielt høge straumprisar og ekstraordinære inntekter. Då vil denne skatten også vere ressurs- og teknologinøytral som for vindkraft og havbruk.
Høgprisskatten må reknast ut frå gjennomsnittleg inntening heller enn «time for time». Denne skatten rammar evna til å investere i nye prosjekt med stor reguleringsevne, slik den er innretta no. Dersom den blir endra til å gjelde gjennomsnittleg oppnådd pris på årsbasis, så vil det framleis kunne forsvare investeringar i effekt og reguleringsevne.
SF Holding eig 49,51 % i SFE som er det største kraftselskapet i Sogn og Fjordane med ein middelproduksjon på 2004 GWh. SF Holding AS er eigd av alle kommunane i Sogn og Fjordane og Vestland Fylkeskommune. Ein stor del av kraftproduksjonen blir levert i prisområde NO3.
Endringa i skattlegging av kraftproduksjon, som regjeringa presenterte 28. september, vil ifølgje SFE medføre at resultatprognosen for 2022 er redusert frå +150 MNOK til – 100 MNOK for SFE. Det vil seie ein reduksjon på 250 MNOK som følgje av auka skattlegging. Verdireduksjonen for eigarane i SFE er av administrasjonen i SFE rekna ut til å vere 2 MRD.
Grunnrenteskatten gir spesielt negative utslag, men også høgprisskatten gir uønskt konsekvensar slik den no er innretta. Det er svært uheldig at fornybarnæringa vert skattlagt på eit så høgt nivå at det vil redusere utbygginga av fornybar energi i ei tid der dette er mangelvare og heilt avgjerande i kampen mot klimaendringane.
Administrasjonen i SFE har utarbeidd eit notat om endringane i skattlegging av kraftproduksjon som er vedlagt. Notatet gjer grundig greie for kva som er endringane i skattlegginga, kva konsekvensar det vil kunne ha for SFE og deira eigarar, kvifor skattlegginga bør endrast, og kva ein meiner er det viktigaste å endre.
Som hovudeigar støttar vi innhaldet og anbefalingane i notatet og ber om at innspela blir tatt omsyn til i den vidare sakshandsaminga når det gjeld Statsbudsjettet for 2023 og høyringa som gjeld skattlegging av vindkraft.