– Det var eit utruleg flott program. Både kammerkoret, spelinga og solistar var overraskande bra, og det er gøy, seier Raimund Hoclas.
Den store julekonserten løfta inn julestemninga i Bremanger kyrkje laurdag. Skulemusikken fekk orkesterplass og det var barn som stod i fremste rekke med song og musikk, og som fekk tenne lys i adventsstaken.
– Vi hadde det tradisjonelle og gjekk også litt ut på sida, og alt blei like fint. Det var heilt fantastisk, seier Raimund Hoclas, i leiinga som dirigent for arrangøren Bremanger skulemusikk.
Det var fire jenter som spelar i skulemusikken som song som solistar, og i tillegg var Sigurd Strand solist.
– Ungane i Bremanger skulemusikk får bruke det dei held på med. Om nokon syng, spelar bass eller kanskje piano, så blir det brukt, seier Hoclas.
Det er eit ønske at ein vil gje unge solistar ein sjanse til å opptre slik at dei blir vande.
Annette Svarstad, som er leiar for Bremanger skulemusikk, seier at dei har eit sterkt fokus på barna på julekonserten. Konserten laurdag innleia eit nytt samarbeid mellom musikklag og skulemusikk. Dei skal spele og opptre saman fleire gonger.
– Det er veldig i tida at skulemusikken får spele i lag med dei vaksne, seier Svarstad.
Det var Jarle Grotle som hadde laga konsertprogrammet til den tradisjonsrike julekonserten.
– Vi kan ikkje gjere det betre, eigentleg, seier han tilfreds.
Julekonserten var med Bremanger skulekorps og Bremanger kammerkor som alltid er med, og i år med også Bremanger musikklag.
Publikum fekk høyre song og musikk som korpsa og koret ikkje har framført tidlegare. Musikklaget kom med solist Sigurd Strand og spelte «It’s the most wonderful time of the year» for første gong. Skulemusikken hadde øvd inn «Jul i svingen», og kammerkoret song «Candlelight Carol» som er ein ny song på deira repertoar.
Programmet hadde fire allsongar og Jarle Grotle seier «Det lyser i stille grender» måtte bli allsong fordi den ikkje vart sett på speleprogrammet denne gongen. Julesongen med tekst av Jakob Sande vil han ha med når det er julekonsert i kyrkja.
– Det som alltid går igjen er Deilig er jorden.
Til solist med kammerkoret på salmen «Mitt hjerte alltid vanker» hadde Jarle Grotle invitert saksofonist Laila Beathe Førde, som han seier er ein fantastisk musikar.