– Vi får det inn med morsmjølka, smiler Sigrid Elise Midthjell, som var med frå Vindfylla spelemannslag på julekonserten i lag med både faren Berner Midthjell og døtrene Sophie (9) og Julie (7).
Sigrid Elise var to månader då foreldra tok ho med på landsfestivalen i gammaldansmusikk, og som tiåring var ho med på den første julekonserten. Søndag gjorde Sophie og Julie sin julekonsertdebut. Der fekk jentene spele i lag med mor og morfar når feleaspirantane og Vindfylla spelemannslag stod på scena i lag.
– Det er veldig gøy og morsomt når eg ser at menneske som høyrer på blir glade av musikken, seier Sophie Midthjell Sundal.
Ho og søstera har spelt fele i Stad kulturskule sidan dei byrja i haust.
Mektig konsert
Kjølsdalen kyrkje var fullsett på den tradisjonsrike julekonserten som vert arrangert av Kjølsdalen Musikklag søndag før jul.
Leiar for musikklaget er Anne-Britt Nor og ho seier at konserten var mektig.
– Det var fantastisk med alt frå ungane som song og spelte til det å sitte og spele sjølv og ta imot så mykje fin musikk frå andre, både solistar, songsolistar og orkester, seier Nor.
Slik det er tradisjon for deltok Kjølsdalen skulemusikk, Kjølsdalen montessoriskule, Kjølsdalen Musikklag, feleaspirantane og Vindfylla spelemannslag.
Gjester var Anna, Hege og Arnt-Ivar Naustdal som kom med song på konserten.
– Det var veldig, veldig fint, seier Anne-Britt Nor.
Kjølsdalen Musikklag med dirigent Kari Standal Pavelich overraska publikum med ein norgespremiere på Julenatt frå Soga om Sol arrangert for brass. Verket var bestilt til musikklaget og julekonserten.
– Det var flott med ny musikk og eit nytt arrangement, seier Anne-Britt Nor.
Som alltid var det allsong på konserten, først Det lyser i stille grender og til slutt Deilig er jorden.
Gav julestemning
– Det var så koseleg. Eg føler konserten gjev meg den julestemninga eg mangla, seier Vibeke Haus.
For Haus er julekonserten i Kjølsdalen tradisjon. Før var ho med og spelte i korpset, no kjem ho for å høyre på. Denne gongen likte Vibeke Haus veldig godt trykket som var i barnekoret ved Kjølsdalen montessoriskule som kom med musikalsk leiar Thomas Hals.
– Du ser at dei er så glade for å vere der. Det er koseleg å sjå på, seier Haus.