O Helgesen Natt: Opplev litt av den årlege julekonserten
– Eg er veldig nervøs, seier Ellen Kine Helgesen ei lita stund før konserten.
Ho er nest yngst av dei åtte Helgesen-søskena.
– Vi gler oss til å stå på scena for å vise kva vi har øvd på den siste tida, seier den nest eldste av søskena, Christine Helgesen.
Laurdag hadde Helgesenkoret to konsertar etter kvarandre.
– For å gjere det enklare for oss sjølve har vi begge konsertane rett etter kvarandre, seier Christine.
Kvar einaste førjul dei siste elleve åra har familien arrangert julekonsert. Til saman er dei 25, pluss alle borna.
Medlemmene i Helgesenkoret er søskena i familien Helgesen og andre som er gifta inn. Kvar desember står dei med familie og venner på scena.
Planlegg i eit år
Men for at konsertane skal bli noko av, må det planleggast.
– Eg har allereie starta å planlegge neste konsert, seier Line Dybedal.
For at alt skal gå opp har dei starta eigen komite som planlegg konsertane. Og Dybedal har ikkje oversikt over kor mykje tid ho brukar på planlegging og organisering.
Komiteen startar opp i januar og planlegg eit heilt år før neste konsert skal visast fram for publikum. Fellesøvingane byrjar allereie i september.
– I år vil vi prøve å vise litt meir av oss sjølve. Før har vi vore litt høgtidlege, men på øvingar er det ofte mykje tull, og det vil vi prøve å få fram på konserten vår i år, seier Dybedal.
Berre minutt før konserten skal starte er det mykje folk bak scena, i garderoben og i gangane. Den store flokken gjer seg klare for årets konsert.
– Vi er klare, men eg er litt usikker på om absolutt alt sit slik det skal, seier Christine litt nervøst.
Før første tone lyder fyller samfunnshallen seg opp av spente folk. Det tar ikkje lang tid før heile salen er heilt full og alle ventar i spenning på at konserten skal starte.