Elise satsar på fotokarriere for å komme seg ut i verda

Elise Marie Myrvang Eikeland har alltid vore glad i foto. No håpar ho at fotointeressa kan hjelpe ho ut av uføre-trygda.

Fotograf: Elise Marie Myrvang Eikeland, opphavleg frå Måløy, elskar å ta bilete.  Foto: Privat

Nyheter

Elise Marie Myrvang Eikeland frå Måløy brenn for fotofaget. Etter eit kurs i Oslo vart ho oppfordra til å satse. No har ho gjort grep for å bruke bileta sine til å få oppleve verda og komme seg ut av uføretrygd.

Smile to the world: Dette biletet er det fyrste biletet Eikeland meldte på nokon foto-konkurranse.  Foto: Elise Marie Myrvang Eikeland

Flytta 23 gongar

Elise har vakse opp i Måløy, men flytta då ho var berre 15 år gammal.

– Då byrja eg på Nordholdaland folkehøgskule i Bergen. Eg var den yngste på skulen, og var tre år yngre enn det som eigentleg var lov. Men eg fekk spesialtillating.

Etter folkehøgskulen tok ho vegen vidare til Grimstad der ho gjekk på vidaregåande. Allereie då var det andre som viste interesse for fotokunsten hennar.

– Då eg var russ vart eg stemt fram som russefotograf, fortel Eikeland.

Sidan har ho vore fleire stader rundt om i landet før ho fann roa på Høvik i 2019.

Etternamnet hennar er for mange eit kjend namn i Måløy-området.

– Faren min, Kjell Arne Eikeland var hotelldirektør på Kaptein Linge Hotell, fortel ho.

Fleire i familien hennar er også kjente figurar i Måløy-området.

– Mormor og morfar dreiv Myrvang frisørsalong i mange år. Mor mi har også vakse opp i Måløy, seier Myrvang Eikeland.

Vil jobbe som fotograf

Ho har alltid vore interessert i foto.

– Eg har gått rundt med fotoapparat over alt, fortel Eikeland.

Ho er utdanna nettjournalist og har tidlegare jobba for mobilen.no og teknofil.no. Sidan 2014 har ho vore uføretryda.

– No er målet mitt å kome meg ut av dette og tene pengar på foto.

Green wonder of nature: Dette biletet er teke i hagen til Eikeland sin familie på Davik.  Foto: Elise Marie Myrvang Eikeland

I fjor gjekk ho på eit kurs i Oslo arrangert av organisasjonen Young Happy Minds. Der vart ho oppfordra til å satse på foto.

– Det er ein fin måte å kome seg ut og sjå verda på, seier Eikeland.

No har ho meldt seg på GuruShots, ei side der ein kan dele bileta sine og melde seg på konkurransar.

– Det er eit fotospel som folk frå heile verda er med i. Der kan ein kome seg opp på ulike nivå avhengig av kor bra bileta gjer det. No er eg på det som kallast ekspertnivå, tre nivå ifrå gurunivå som er det høgaste nivået, fortel ho.

Curious: Dette biletet er teke i The Kensington Gardens i London.  Foto: Elise Marie Myrvang Eikeland

Gjennom konkurransane på sida har ho vunne fleire utmerkelsar for bileta sine.

Stiller ut i store byar

Eikeland held også kontakt med fleire fotomagasin og galleri rundt om i verda. Bileta hennar har blitt stilt ut i galleri fleire stader.

– I Berlin, to gongar i Barcelona, Mexico city, Hanoi, Budapest, København, og eg ligg godt an til å få stilt ut i Melbourne og Stockholm.

Pink magic: Dette biletet vart publisert i Digital World sitt Photography Week-magasin.  Foto: Elise Marie Myrvang Eikeland

No håpar ho på å kome seg tilbake til heimtraktene i sommar og ta bilete der.

– Eg er veldig glad i Vågsøy og Måløy, og synest naturen der er fantastisk, seier Eikeland