Asbjørn Hamre er primus motor for utelivet på Flatraket skule. I førre veke var han ute og målte isen på Røykvatnet i Almenning fleire gongar.
Då han var sikker på at det var trygt, planla skulen ein kjekk dag for elevane.
– Vi hadde med både lavvo med vedomn og bålpanne. Dette er det også Asbjørn som fiksar, smiler Vigdis Gjengedal ved Flatraket skule.
Elevar og tilsette kosa seg ute i det fine vintervêret, og grilla pølser, åt niste og kjeks og drakk kakao.
Same dag var også Kinn brann og redning ute for å sjekke kor tjukk isen var i dei ulike vatna i området.
– Isen på vatnet blei målt til 22 cm, seier Gjengedal.
Skuleisdagen var for alle klassetrinna.
– Fleire av elevane hadde aldri gått på skøyter før, så dette var spennande for mange. Ein del elevar fekk også prøve ishakker og å drage seg fram på isen. Så dagen blei både sosial, koseleg, spennande og ikkje minst lærerik, avsluttar ho.
Familiekoret med venner ønsker stadig å utvikle seg – no lovar dei enda meir show og moro
Røykvatnet tilhøyrer Falkevik gard, der Roy Husevåg og kona Franzi Menzel er ein av grunneigarane.
– Røykvatnet er eit skøyteparadis og vi synest berre det er stas at området blir brukt, seier Husevåg.
Dei spurde om brannvesenet kunne komme og måle isen.
– Det er eit topp brannvesen vi har som kjem og målar nærmast på dagen, seier han.