Leirset kjem opphavleg frå Verdal, men flytta til Måløy i januar for å jobbe. Ein av kollegaane der, Stine Mårstøl Reite, hadde eit forslag til fritidsaktivitet for Leirset.
– Eg heiv meg eigentleg berre med fordi Stine freista meg til å gjere eit lite comeback, seier Leirset til Fjordenes Tidende.
Tidlegare har ho spelt for både Vuku i 3. divisjon og moderklubben Verdal i 2. divisjon. I helga var ho på bana for andre gang etter å ha meldt overgang til Måløy FK.
– Det er lenge sidan eg har spelt kamp, men eg kjende no at det freista å kome seg tilbake på bana, seier ho.
Og det gjorde ho rett i. I alle fall sett frå Måløy si side.
Då Fjordenes Tidende prata med ho like etter kampslutt hadde ho akkurat avgjort kampen for sitt nye lag. På stillinga 2–2, og med ti minutt igjen på stadionuret, gjorde angriparen kort prosess då ho fekk tillit på bana etter å ha starta kampen på benk. To kjappe mål og status som dagens helt for dei marineblå var eit faktum.
– Det gjorde godt! Eg har skjønt at det er litt rivalisering mellom desse laga, så då er det jo ekstra artig å sette to mål og avgjere på bortebane, avsluttar ho.
– Gode lag vinn på dårlege dagar
Alt var klart for dramatikk fredag kveld på Selje idrettspark: Nordfjord-derby, nabokommunar, by mot land og mange tilskodarar, både lokale og tilreisande.
Det var tydeleg for alle at det var meir enn berre tre poeng som stod på spel då heimelaget Selje/Åheim tok imot rivalane frå Måløy fotballklubb.
Det var også noko som prega kampen, kanskje mest for dei som kom sigrande ut av slaget.
– Det er alltid godt å vinne. Men det var ganske ujamt, seier Måløy-trenar Per-Magne Løken like etter kampslutt.
– Vi styrte ganske mykje av første omgang og hadde ballen nesten heile tida, men i starten av andre omgang slepp vi oss litt ned. Mot slutten ser vi at dei blir slitne, så då får vi bra kontroll igjen, men vi klarte ikkje heilt å bruke ballen fornuftig sjølv om vi hadde spelemessig overtak, seier han.
– Fortent at dei vann
Selje/Åheim-kaptein, Sofie Hove, vedgår etter kampen at dei tapte mot eit betre lag.
– Skal eg vere ærleg, så var dei eit betre lag enn oss, og då vinn dei fortent. Måløy sin kamplan fungerte mykje betre enn vår, men samtidig synest eg at vi i periodar heva oss godt. Men vi klarar ikkje heilt å sette angrepsspelet vårt, seier kapteinen.
Hove vil ikkje gi slitne spelarar skulda for utfallet aleine, men trur samtidig at treningskvardagen til dei to laga ligg langt ifrå kvarandre.
– Eg vil ikkje seie at vi er dårleg trent, men eg trur Måløy har ein betre treningskvardag enn oss. Vi er ikkje så mange på trening, og det kom tydeleg fram i denne kampen.
Heimelaget starta best
Men trass dette var det heimelaget som først fekk hol på byllen då Lene Refsnes sette inn kampens første, litt mot spelets gang, etter 22 minutt.
Åtte minutt seinare fekk gjestane likevel utteljing på sjansane då rutinerte Helene Marjavara Inselseth utlikna etter eit skot som sneik seg inn ved stolperota.
Berre sju minutt etter det vart det meir å juble for i Måløy-leiren då kaptein Emilie Andal sende bylaget i leiinga.
Men like før kvilen var Guro Lesto Larsen på plass for heimelaget og sette pauseresultatet til 2–2.
Etter pausen var det, som ein seier på godt norsk, mykje klabb og babb begge vegar. Måløy styrte spelet men det ville seg ikkje, mykje takka vere ein god sisteskanse i Selje/Åheim-buret Emma Wold Haugland.
Men i det 80. og 87. minutt dukka altså Linn-Therese Leirset opp, som med to mål avgjorde kampen i favør gjestane.
Bildeserie