Skavøypoll Drilltropp deltok i Midtnorsk meisterskap i drill i Ålesund laurdag.
Åtte jenter frå troppa, alle mellom ni og tolv år gamle, tok turen til Ålesund saman med ei gruppe foreldre.
– Dette er den første konkurransen jentene har vore med på, så det er ei ny og spennande erfaring for alle saman, seier Gro Anita Nødset som var med i foreldregruppa.
Det var 12 drilltroppar som deltok i meisterskapen, med 164 unike startnummer, sidan drilljentene konkurrerte i fleire ulike øvingar.
– Mange av deltakarane dansa solo, med éin eller to drillstavar. Og så var det konkurranse i duettar, der to jenter opptrer saman, seier Nødset til Fjordenes Tidende.
I fellesprogrammet enda troppen fra Skavøypoll Drill på fjerde plass i ein pulje av fire lag.
– Troppane frå Ålesundsområdet har nok garantert meir enn ein time trening i veka, som vi har. Men vi er like blide! Jentene har kosa seg, seier Gro Anita Nødset, og held fram:
– Når vi etterkvart skal ta opp nye aspirantar i troppen, så kan elevar frå alle skulekrinsane, ikkje berre Skavøypoll, søke om plass.
