Namn: Øystein Eckhoff
Alder: 33 år
Sivilstand: sambuar
Yrke: musikar og pianostemmar
Bustad: bur i Volda, men oppvaksen i Syvde i Vanylven.
– Kva er du mest oppteken av?
– Sånn innerst inne er eg vel mest oppteken av mellommenneskelege forhold, samt personleg utvikling. Utover det går det i musikk og kattar på YouTube.
– Kva gjer du på fritida?
– Eg spelar ein del fotball, og så blir det TV-seriar litt seinare på kvelden. Når det høver seg, samlast vi ein kompisgjeng og spelar poker og løyser verdsproblem.
– Kven beundrar du?
– Eg beundrar ganske mange. Ein av favorittheltane mine er Victor Borge, ein avdød dansk pianist og humorist. Eg skulle ynskt eg hadde oppdaga han tidlegare og fått opplevd han.
– Kva er det beste med heimstaden din?
– Heimstaden min Syvde, og Vanylven generelt, har mykje flott natur, men det beste med plassen er likevel folka som bur der og minna ein har derifrå. Det er alltid stas å reise tilbake i feriar og høgtider og ein kan treffe vener som ein vaks opp saman med.
– Kva står på di førsteside av Fjordenes Tidende?
– Nytt lovforslag gir svindyr avgift på julemusikk i oktober.
– Kva ville du ha gjort om du var ordførar for ein dag?
– Eg ville ha sjekka kor mykje ordførarkjedet faktisk veg.
– Kva kulturoppleving hugsar du best?
– Eg hugsar mange. Det er vanskeleg å sette gode kulturopplevingar opp mot kvarandre, men ein av dei som verkeleg sette spor var det rytmebaserte showet «STOMP», tidleg på 2000-talet. Uforgløymeleg.
– Kva har du på nattbordet?
– Der ligg mobilen, men utan å lade!
– Kva nettstadar er du innom i løpet av ein dag?
– Facebook, VG, Facebook, Netflix, Pianostemmar.no, Facebook, NRK og Facebook.
– Kva er meininga med livet?
– Det seiast at det er 42. Heilt greitt for meg inntil vidare.