Etter eitt år med anleggsarbeid står Hogaåsen bustadfelt om kort tid klart for nye husbyggjarar.
Ferdigstilling av infrastruktur i bustadfeltet og delovertaking av området er tidfesta til 15. desember, og etter planen kan tomtearbeid og husbygging i Hogaåsen ta til ved årsskiftet, skriv Eid kommune i ei pressemelding.
To husbyggjarar står allereie klare til å ta fatt på tomtearbeid og husbygging på nyåret, og to andre er i søknadsfasen for tomtekjøp.
– Tomtene for privat bustadbygging har vore for sal sidan februar, og det har vore ein jamn straum med førespurnadar frå potensielle tomtekjøparar. Når området no vert tilgjengeleg og tomtene står klare for bygging, vil kjøpsprosess og avgjersle om tomtekjøp bli enklare for alle nye og eksisterande eidarar som ønskjer å byggje seg hus. For Eid kommune er viktig at alle som vil bu i Eid får moglegheit til å kjøpe si eiga tomt og byggje sin eigen bustad. Hogaåsen bustadfelt er den største bustad-feltutbygginga i Eid på over 30 år, og vil gje god tilgang på byggjeklare tomter i åra framover, heiter det i pressemeldinga.
– Det er stor mangel på mindre bustadeiningar i Eid kommune, og behovet for denne typen bustadar vil på sikt også auke. Det vert derfor flott å komme i gang med fleire bustadprosjekt som gjer tilgangen på slike bustadar større.
Tida fram mot desember vert nytta til ferdigstilling av vegnett og resterande infrastruktur i feltet. Ein er også godt i gang med opparbeiding av dei to leikeplassane.
– Målsetninga er å ha desse ferdigstilt tidleg på nyåret, slik at husbyggjarar med små born kan ha glede av desse når byggingsfasen går i gang.
Heile feltet med vegdekke og grøntareal er planlagt å stå ferdig våren 2017. Dei planlagde utbetringstiltaka på det eksisterande vegnett vil bli gjennomført våren 2017.