– Knutholmen «tjuvstartar» festivalen, som går av stabelen 4.–6. august, med bryggeshow torsdag kveld, og som vanleg blir det aktivitetar i heile Kalvåg festivaldagane, og for dei sprekaste blir det trappeløp opp på Varden laurdag, heiter det i ei pressemelding frå kystfestivalkomiteen.
Det er fiskarbonden som er tema for årets kystfestival.
– Vi har båtane han brukte, og i år lagar vi til gardstun midt i Kalvåg, med dyr og aktivitetar for barn, seier Jannike Brenden Frøyen, som er leiar i programkomiteen.
Men det er fleire aktivitetar på programmet. Arrangørane utvidar det Historiske visningssenteret med kurs i seising av kuler, baking og ølbrygging.
– Og så kan vi glede alle med at Kalvåg songlag kjem med nytt show på scena på Amtskaia, med fiskarbonden som tema, fortel Frøyen.
Den populære «Rorbua» er også på programmet, og det blir rokonkurranse for vaksne.
– Programmet for festivalen er stort sett ferdig. Nokre detaljar arbeider vi med, og vi håper å få på plass nokre populære innslag, seier Frøyen.