Då tilsette ved Svelgen oppvekst måndag oppdaga kakerlakkar, var dei raskt på banen med tiltak. Men det kan likevel ta fleire veker, kanskje månader, før skadedyra er fjerna for godt.
– Kakerlakkane blei oppdaga første dag etter sommarferien, på SFO-avdelinga, fortel driftssjef Carina E. Solvåg.Dei tok affære med ein gong.
– Vi kontakta teknisk avdeling lokalt og ringde miljø- og helsevernet i Flora og snakka med smittevernlegen. Via han fekk vi kontakt med Rentokil som var på plass onsdag.
Har stengt av avdeling
Etter råd frå Rentokil stengde skuleleiinga av SFO-lokala og har funne andre lokale på skulen til desse elevane.
– Vi har låst igjen, teipa sprekker under og rundt døra og stengt ventilasjonssystemet. Alt for å prøve å hindre at dei spreier seg, seier Solvåg.
Alle matvarer som var opna er kasta, og nye matvarer til skulen vil bli pakka i tette boksar. Skuleleiinga har også sørga for at kleda som låg på avdelinga blir handtert på ein slik måte at dei ikkje representerer noko vidare fare for spreiing.
Krydder og limpapir
– Kva gjer de vidare no?
– No er det ikkje meir vi kan gjere. Rentokil har vore inne og sett ut det dei skal sette ut – krydderlukt for å lokke kakerlakkane inn i ein boks der det er limpapir. Rommet skal også haldast mørkt, for kakerlakkar er nattaktive, og vi har skrudd ned temperaturen. Mengda dyr på limpapiret vil så gje eit bilde av omfanget, seier ho.
Limpapiret er også sett inn med eit middel som tek livet av kakerlakkane.
– Når kan ein vere kvitt dette?
– No må avdelinga vere stengd eit par veker, så kjem Rentokil tilbake og sjekkar. Dei set òg ut nye feller om det skal vere nødvendig, seier driftssjefen, som ser at det vil ta si tid å bli kvitt skadedyra.
Ingen panikk
Ifølgje driftssjefen tek både tilsette og elevar dei nye gjestene på skulen med fatning.
– Dette er ikkje noko å få panikk over. Det er ikkje farleg med verken kakerlakkar eller lus. Men det er ein uting vi ikkje har lyst å ha i hus, og vi håpar å få handtert dette så fort som råd er, seier Solvåg.