Jobben med å ta ned fem gamle turbinar på Mehuken mellom Kvalheim og Kråkenes i Vågsøy har gått etter planen.
Det er Kvalheim Kraft som er i gang med vidare utbygging av vindmølleanlegget Mehuken III
Det betyr at dei skal ta ned fem av dei første møllene som var bygde, og erstatte desse med tre nye og langt kraftigare møller.
– Vi har hatt nokre vêrutfordringar, men alt har gått etter planen, seier byggeleiar Ragnar Hagen, som har oversikt med arbeidet på Mehuken III.
Arbeidet tok derfor ein liten pause til det fekk blåst frå seg.
– Transporten har også gått fint. Vi beklagar sjølvsagt dei ulempene det har ført med seg for dei som bur nær ruta, men vi har berre registrert ein klage, seier Eivind Fuglum i Kvalheim Kraft.
Han fortel at dei oftare opplever at folk er oppe med mobilen for å ta bilde enn at dei er sinte.
– Det er positivt å drive business i Måløy for folk stiller opp, vil oss vel og set pris på at vi er der, seier Fuglum.
Måndag starta jobben med å tilrettelegge for dei nye møllene for fullt.
– Først er det grunnarbeid, og seinare på hausten støyper vi dei tre nye fundamenteringspunkta slik at dette er klart til montering av nye turbinar i mai neste år, seier Ragnar Hagen.
Det vil vere dei tre nedste plassane ved gamle Mehuken I som skal brukast.
Det kjem ingen møller heilt på toppen.
Anlegget er venta å vere heilt ferdig i slutten av juli 2015.
Les meir i papirutgåva måndag 1. september.