Fylkesdirektør for samferdsle Velaug Veum ser ingen grunn til at Berletunnelen på fv. 575 i Bremanger kommune ikkje skal få endre namn til Berleporten slik bygdefolket vil.
– Sidan dette er eit innarbeidd tunnelnamn i området og både lokalbefolkning, kommunen og stadnamntenesta er samd i skrivemåten, meiner Statens vegvesen at Berletunnelen kan få endre namn til Berleporten. Fylkesdirektøren for samferdsle sluttar seg til Statens vegvesen sine vurderingar og konklusjon, skriv Veum i saksgrunnlaget til hovudutval for samferdsle.
Saka skal opp for fylkespolitikarane 23. september.
Namneendringa vil ikkje ha nemneverdige økonomiske konsekvensar. Kostnad med å sette opp nye namneskilt vil truleg ligge på rundt 20. 000 kroner, trur fylkesdirektøren.